Şəhər sakini Günel Əliyeva Xeberle.com-a müraciət edərək tanımadığı şəxs tərəfindən aldadılaraq 50 manat civarında pulunun mənimsənildiyini qeyd edib. Vətəndaş həmçinin iddiasında bildirib ki, Aysel Əliyeva adlı xanımla rəfiqələri vasitəsi ilə gözəllik salonunda tanış olub: "Yaxın çevrəmdən xanım haqqında maraqlanarkən, hər kəs onu normal bir qadın kimi tanıdıqlarını bildiriblər. Belə olan halda həmin xanımın mənə sosial müavinat düzəldəcəyinə inanaraq may ayında, 50 manat ödəməklə, lazım olan sənədləri toplayıb A.Əliyevaya vermişəm. O isə məni aldadaraq sosial müavinat üçün sorğu göndərdiyini bildirib. Bir neçə ay keçsə də, sorğuma cavab gəlmədiyimi görüb Aysel Əliyevadan pulumu tələb etdim, lakin xanım nə pulu geri qaytarır, nə də ki, yaranan suallara cavab verir", - deyə o bildirib.

Vətəndaş həmçinin iddia edir ki, A.Ə. tərəfindən aldadılan yeganə şəxs o deyil, A.Ə.-nın yaşadığı yataqxanada onlarla onun kimi pulu mənimsənilən ailələr var. Xeberle.com olaraq şikayətçi vətəndaşın verdiyi əlaqə nömrəsinə əsasən Aysel Əliyeva ilə danışıb yaranan problemi qarşılıqlı araşdırmaq istədik. Lakin qadının telefonuna zəng çatmadı, internet üzərindən yazdığımız SMS-lərə isə, "Aysel deyil, sizə nə lazımdır?”- deyə cavab verildi.

Problemin hüquqi tərəflərinə isə hüquqşünas Ramil Süleymanovlaaydınlıq gətirdik. Hüquqşünas təəssüf hissi ilə bildirib ki, mövcud şəraitdən istifadə edən işbazlar var və aztəminatlı ailələrin az məbləğdə pullarını mənimsəyərək sənədləşmələrdə onlara kömək edib, müavinət almaqlarına yardımçı olacaqları kimi yalan vədlər verirlər. "Sadəlövh, savadsız vətəndaş isə belə vədlərə aldanaraq işbazların təklif etdiyi həmin məbləği onlara verməklə sosial müavinatla təmin olunacaqlarına inanırlar. Öncə vətəndaşlar belə hallarla rastlaşmamaq üçün peşəkar şəkildə hüquqşünaslara sənədləri təqdim etməklə və ya birbaşa ƏƏSMN-in müvafiq şöbələrinə yaxınlaşaraq, həmin şöbə əməkdaşlarından lazım olan sənədləri elektron qaydada nazirliyə göndərmək üçün kömək istəməlidirlər. Həmçinin şikayət edən xanım mütləq qaydada digər aldadılan vətəndaşlarla kollektiv şəkildə şikayət ərizəsi ilə hüquq-mühafizə orqanlarına müraciət etməlidirlər. Ərizə qəbul olunduqdan sonra araşdırma başlayacaq. Dələduzluğun məbləğindən asılı olmayaraq iddia qəbul olunmalı və araşdırılmalıdır. Hüquq mühafizə orqanlarının vətəndaşın müarciətini "məbləğ azdır" deyə qəbul etməməsi özü artıq bir cinayətdir və vətəndaş bununla bağlı birbaşa yaşadığı qeydiyyat üzrə prokurorluğa müraciət etməlidir. Şikayət hüquq mühafizə orqanları tərəfindən sübuta yetirilərsə, vətəndaşlara dəymiş ziyan ödənilməlidir", - deyə R.Süleymanov qeyd edib.

Xədicə Səxavətqızı

Xeberle.com