Son zamanlar ardı-ardına məscidlərdə baş verən təxribat xarakterli hadisələr məcdilərin mühafizə sisteminin gücləndirilməsi məsələsini gündəmə gətirib. Sumqayıt şəhərinin Cümə məscidinin divarına elə Məhərrəm ayının ilk günüdə "God!No!Were!” şüarının yazılması, ardınca Qaraçuxur qəsəbəsində yerləşən məscidin yandırılması hadisəsi baş verdi. Bu səbəbdən Dini Qurumlarla İş üzrə Dövlət Komitəsinin sədri Mübariz Qurbanlı Azərbaycanda məscidlərdə xüsusi mühafizə sistemlərinin yaradılmasına ehtiyac olduğunu bəyan edib. Komitə sədri artıq bu sahədə işlərin görüldüyünü də vurğulayıb: "Mühafizə sistemi olan məscidlər var, amma biz bunu bütün məscidlərdə tətbiq etməyə və təkmilləşdirmək üzrə işlər aparmağı düşünürük”, - deyə o bildirib.

Sumqayıtın Cümə məscidinin divarına yazılmış şüar şəhər sakinlərinin narazılığına səbəb olmuşdu. Belə bir vaxtda, suallar yaranır:

Sumqayıt şəhər Cümə məscidi və Corat qəsəbəsində yerləşən məscidin mühafizəsi necə təşkil edilib?
Bu məscilərinin mühafizəsinin gücləndirilməsinə ehtiyac varmı?

Hər iki məsciddə mühafizə sisteminin necə təşkil edildiyi ilə maraqlandıq. Sumqayıt şəhər Cümə məscidinin axundu Hacı Rauf Xeberle.com-a açıqlamasında məscidin həyətində və içərisində təhlükəsizlik kameralarının yerləşdirildiyini söylədi. Demək olar ki, bütün otaqlarda kameralar var. Axund təhlükəsizlik kameralarının olmadığı vaxtlarda məsciddə oğurluq kimi xoşagəlməz halların olduğunu qeyd etdi: "Əvvəllər məsciddə oğurluq kimi xoşagəlməz hallar yaşanıb. Amma indi belə hadisələrlə rastlaşmırıq. Olsa da, kameralar var, əli əyrilik edənlərin kim olduğunu bilmək olar". Hacı Rauf məscidin divarının ətrafının da mühafizəsi üçün, hasar tərəfə əlavə kameralar quraşdırmaq niyyətində olduqlarını bildirdi.
Corat qəsəbə məscidinin axundu Hacı Sahib portalımıza söyləyib ki, artıq bir ilə yaxındır ki, Corat məscidinin həm həyətində, həm də içərisində təhlükəsizlik kameraları var. Corat məscidində də kameralar olmayanda müxtəlif oğurluq hadisələri yaşanırdı. Axund Hacı Sahib təhlükəsizlik kameraları quraşdırıldıqdan sonra qəsəbə məscidində hər hansı bir xoşagəlməz hadisənin baş verdiyinə şahid olmadıqlarını bildirdi.

Aytən Əli
Xeberle.com