Vətən Müharibəsində qəhrəmanlıq göstərərək adını tarixə yazdıranlardan biri də şəhid mayor Ramil Ağayevdir.
Xeberle.com xəbər verir ki, Ramil Cəbrayıl rayonunun alınmasında fəal iştirak edib,
Füzuli istiqamətində gedən döyüşlərdə isə yaralı yoldaşlarını döyüş
meydanından çıxararkən şəhidlik zirvəsinə yüksəlib.
Anası
Şərafət Ağayeva gözlərindəki kədəri gizlətməyi bacarmasa da, oğlunun
qəhrəmanlığından məğrurluqla danışır: "Gəldim, gördüm bayraq asılıb.
Yoldaşı bayraq asıb. Dedi, narahat olma, oğlun dedi ki, inşallah qələbə
bizimlədir. Bayrağı asın balkondan, qabağa gedirik, qələbə bizdədir”.
Ramil
Ağayev döyüşlərdə düşmənə məxsus 12 tankı və digər texnikaları şəxsən
özü ələ keçirib. Döyüş meydanında düşmənin canına vəlvələ salan Ramilin
qəhrəmanlığından indi hər kəs qürur hissi ilə danışır. 18 illik hərbçi
karyerası ərzində qüsursuz xidmət edən mayor Ramil Ağayevin "Şəhidlər
ölmür, ölməyənə ağlamazlar", - deyən həyat yoldaşı Sevil Ağayeva
müharibə başlayandan hər şeyə hazır olduğunu bildirir. Hazırda 2 qız
övladı böyüdən ana şəhid yoldaşı ilə qürur duyur. Deyir ki, 36 yaşını
dekabrda qeyd etməyə hazırlaşan Ramil elə şəhid olmaq üçün doğulmuşdu:
"Gözəl ata, məsuliyyətli ailə başçısı, vətənpərvər oğul, dövlətini,
millətini sevən insan idi. 15 illik evlilik həyatımda Ramil mənə
dəfələrlə demişdi ki, mən 35 yaşında şəhid olacam. Şəhidliyi də özünə
çox arzulayırdı, çox”.
Bu
ada layiq olduğunu Ramil əvvəllər də dəfələrlə nümayiş etdirib. Qohumu
Ramiz Ağayev deyir ki, xidmət etdiyi hərbi hissədə diviziyanın qərargah
rəisi olan qəhrəmanımız 2016-cı ilin Aprel döyüşlərində böyük şücaət
göstərib və bir sıra mükafatlara layiq görülüb: "Onun həmişə fikri,
beyni, düşüncəsi vətən torpaqlarında olub. Biz hamımız Ramillə fəxr
edirik. Bizim qədirbilən xalqımız onu heç vaxt unutmayacaq”.
Övladları
da ataları ilə hər zaman fəxr etdiklərini deyirlər. Atalarının
qisasının yerdə qalmaması isə onlar üçün təsəlli qaynağıdır.
Mayor Ramil Ağayev öz vəsiyyəti ilə doğulub boya-başa çatdığı Lerik rayonunda dəfn edilib.
Xəbərdən istifadə edərkən istinad etmək vacibdir.
