Haqqında bəhs edəcəyimiz həmin igidlərdən biri də oktyabr ayının 4-də Suqovşanın işğaldan azad edilməsi uğrunda gedən döyüşlərdə qəhrəmancasına şəhid olan Əhmədəliyev Kərim Rövşən oğludur. 1998-ci il 12 iyunda Sumqayıtda dünyaya göz açan Kərim Sumqayıt şəhər 5 saylı tam orta məktəbi bitirib. Azərbaycan Texnologiya Universitetini bitirdikdən sonra magistratura pilləsində təhsilini davam etdirmək istəsə də, vətən eşqi onu hərbi xidmətə yollanmaq həvəsini artırır.

Hərbi xidmətinə Goranboyda - Ballı qayada başlayan Kərimin 44 günlük müharibədə qoyacağı unudulmaz izləri isə Ağdam rayonunda davam edir.

Təbiətən mülayim, xoşrəftar, qayğıkeş, sadə və səmimi bir insan olan Kərim Əhmədəliyev düşmən təxribatları başlayan ilk günlərdən etibarən heç bir tərəddüd etmədən ən çətin əməliyyatlarda iştirak edir. O, qaynar döyüşlərin getdiyi kəndlərin və strateji yüksəkliklərin azad edilməsi istiqamətində böyük şücaətlə vuruşdu. Hücum əməliyyatında mövqelərin çətinliklərinə baxmayaraq döyüşlərə davam edib qəhrəmancasına şəhadət zirvəsinə yüksəldi. Oktaybr ayının 4-də şəhid olan Kərim Əhmədəliyevin nəşi 4-5 gün yüksəklikdə neytral zonada qalıb. Oktyabr ayının 10-da isə Sumqayıt şəhər Şəhidlər Xiyabanında torpağa tapşırılıb.

Kərimin anası Tamella Əhmədəliyeva xanımın indi tək istəyi oğlunun döyüş yoldaşlarının, onunla bir hərbi xidmətdə olan dostlarının ana ilə əlaqə yaratmalarıdır. Onlardan eşitmək istədiyi kəlmələr, paylaşacaqları söhbətlər ananın yarasına az da olsa məlhəm olacaq. Çünki müharibə başladıqdan sonra oğlu ilə çox tez-tez telefon danışıqları olmayıb, danışanda da çox qısa danışarmış. Elə ana ilə bala arasında olan son telefon danışıqları oktyabr ayının 2-də olub. Yenə çox qısa- "Hər şey çox yaxşıdır” deyən Kərim 2 gün sonra şəhidlik zirvəsinə ucalıb.

Ailədə özündən başqa 1 qardaş, bir bacısı olan Kərimin məktəb və tələbəlik illərindən dostluq etdiyi tanışları da çoxdur. Dostları Kərimin yaxşı sirdaş, sədaqətli dost olduğunu deyirlər.

Şəhidin dostu Rəşad Rzaquliyevdeyir ki, Kərim həm sinif yoldaşı, həm də dostu olub: "Qardaşımdan onunla yaxın olmuşam, bizi görənlər əkiz qardaş olduğumuzu düşünürdü. 22 illik həyat yolumuzda bizim bizdən yaxınımız olmayıb. Yalnız mənim hərbi xidmətdə olduğum müddəti biz ayrı olmuşuq. Onunla bizim gələcəyimiz haqqında planlarımız var idi. Kərim hərbi xidməti bitirdikdən sonra bizim üçün yeni bir həyat başlayacaqdı. Dostu, qardaşı, sirdaşı olaraq Kərimi itirmək mənə çox ağır olsa da , şəhidlik zirvəsinə ucaldığı üçün qururlanıram.

Əli Ağayarov isə K. Əhmədəliyevlə bir məhlədə böyüyüb. Onun da deməyə sözü var: "Çox yaxın dost olmuşuq, eyni məhlədə böyümüşük. Mən ondan yaşda böyük olsam da, Kərimin yaşının az olmasını heç vaxt hiss etməmişəm. Elə bil eyni yaşdaydıq, heç vaxt özünü uşaq kimi aparmazdı. Öz yaşıdlarından həmişə fərqlənib. Kərim gəzməyi çox sevirdi. Sumqayıt şəhər Şəhidlər xiyabanını açığı tez-tez getməzdim. Amma dəfələrlə Kərim məni aparıb şəhidlərin ziyarətinə. Özü də tez-tez gedərdi Şəhidlər xiyabanına. Biz dostları olaraq heç birimiz onun nömrəsini telefonumuzdan silə bilmirik, elə bilirik ki, Kərim sağdır və haçansa zəng edəcək. Onun yoxluğunu qəbul edə bilmirik.

Ramin Yunusov Kərimin hər kəsin sevimlisinə çevrildiyini deyir:” Kərim haqqında heç kim heç zaman deyə bilməzdi ki, nə vaxtsa kobudluq, mədəniyyətsizlik edib. Hər şeyin yerini çox gözəl bilirdi, uşaqla uşaq, böyüklə böyük kimi rəftar edərdi. Heç kəs onun haqqında neqativ bir şey deyə bilməzdi. Onun haqqında saatlarla danışsam azdır. Allah bütün şəhidlərimizə rəhmət etsin”.

Prezident İlham Əliyevin sərəncamı ilə K. Əhmədəliyev "Vətən uğrunda" medalı ilə təltif edilib.

Qarabağda Azərbaycanın bütövlüyü uğrunda canlarından keçmiş bütün şəhidlərimiz kimi Kərimin də ömür yolu gənclərimizə örnəkdir. Hər bir Azərbaycan vətəndaşı öz qəhrəmanlarını tanımalı, onların keçdiyi həyat yolundan çox şeyləri öyrənməlidir.

Vətənimizin müdafiəsi uğrunda savaşmaq və şəhidlik zirvəsinə ucalmaq ən böyük şərəf və qürurdur.

Xədicə Səxavətqızı

Xeberle.com