Azərbaycanın 44 gün davam edən və ordumuzun inamlı qələbəsi ilə başa çatan Vətən Müharibəsi neçə-neçə həyat hekayəsi, qəhrəmanlıq salnaməsi ilə yaddaşlara həkk olundu.
Qarşılarına 30 ilin həsrətinə son qoymağı məqsəd qoyanlar ömürlərinin baharında, gənc yaşlarında bu amal uğrunda qəhrəmancasına canlarını fəda etdilər. Gözlərini də qırpmadan "Vətən sağ olsun dedilər”.
Elə 30 yaşlı şəhid gizirimiz Əliyev Xəqani Füzuli oğlu kimi.
II Qarabağ müharibəsinin qələbə ilə bitməsində əməyi olan, qanı ilə tarix yazan şəhidimiz 1990-cı il iyul ayının 12-də Yardımlı rayonunun Çanaqbulaq kəndində doğulub. Ailədə 3 qardaş olublar. O, 2009-cu ildə 10 saylı Sumqayıt şəhər Peşə Liseyini bitirib. 2011-ci ildə Daxili Qoşunlarda xidmətə başlayıb.
2013-cü ildə ehtiyata buraxılan Xəqani Əliyev daha sonra, 2015-ci ildə yenidən N saylı hərbi hissədə kəşfiyyat tağım komandirinin müavini kimi xidmətə başlayır.
Yüksək döyüşçü bacarıqları və qüsursuz xidməti nəzərə alınan Xəqani Əliyev "Azərbaycan Ordusunun 100 illiyi” yubiley medalı ilə təltif olunub.
Ağır döyüşlərdən birində bir neçə güllə yarası almağına baxmayaraq, hospitalda müalicəsini yarımçıq qoyub "əsgərlərim orada qan tökən vaxt mənim burada olmağım doğru deyil” deyərək yenidən döyüş bölgəsinə qayıdıb və oktyabrın 28-də Ağdərə istiqamətində gedən döyüş əməliyyatları zamanı qəhrəmancasına şəhid olub. 30 oktyabrda isə Sumqayıt şəhər Şəhidlər xiyabanına dəfn olunub.
Şəhidin anası Mömünə Məmmədova deyir ki, Xəqani şəhid olana qədər biz onun döyüşlərdə olduğunu, nə də ki, yaralandığını bilmişik. Çox mətin, qəhrəman oğul idi, heç nədən qorxmazdı. Şəhid olduğu günə qədər hər gün telefonla əlaqə saxlayardıq. "Hər şey yaxşıdır”, "Tərtərdəki hərbi hissədəyəm” deyirdi. Mən onun müharibənin ən qaynar nöqtələrində olduğunu bilmədiyimdən, olduğu hərbi hissəyə düşmənlər atəş açıb, raket atar deyə, narahat idim. Onun yaralanaraq, ikicə gün xəstəxanada qalıb, yenidən döyüşlərə qayıtması xəbərini də biz yalnız Xəqaninin şəhid olmasından sonra öyrənmişik.
Xəqani Əliyev ölümündən sonra "Vətən Uğrunda” medalı ilə təltif olunub.
Şəhid gizirimiz öz əmisi qızı ilə nişanlı idi. Qələbədən sonra toyu olacaqdı...
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
