Rəhman Məmmədov 1997-ci il fevralın 13-də Sumqayıt şəhərində anadan olub. Orta təhsilini Sumqayıt şəhərində 13 nömrəli tam orta məкtəbdə alıb. R. Məmmədov 2015-2017-ci illərdə Azərbaycan Silahlı Qüvvələrinin Tovuz rayonunda yerləşən "N" saylı hərbi hissəsində müddətli həqiqi hərbi xidmətdə olub. O, 2016-cı ilin 2-5 aprelində baş verən döyüşlərdə iştrak edib.

Azərbaycan Ordusunun əsgəri olan R. Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Şuşanın azadlığı uğrunda gedən döyüşlər də daxil olmaqla bir neçə rayon və kəndlərimizin azadlığı uğrunda gedən döyüşlərdə olub. Rəhman Məmmədov noyabrın 9-da Şuşa döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Rəhman Məmmədov ölümündən sonra "Vətən uğrunda" və "Xocavəndin azad olunması uğrunda” medalları ilə təltif edilib.

Anası Səadət Məmmədova deyir ki, Rəhman evin kiçiyi olsa da, hər yerdə özünə hörmət qazanmağı bacaran övlad olub. Həmişə deyərdi ki, "Siz mənimlə həmişə fəxr edəcəksiniz!” "Rəhman elə deyəndə, bilməzdim heç niyə belə deyirmiş, amma indi anlayıram ki, o şəhidlik zirvəsinə ucalaraq həqiqətən fəxr ediləsi oğul oldu. Rəhman çox mərd və cəsur idi. Uşaqlıqdan futbolla məşğul olsa da, hərbi xidmətdən sonra bu yolda davam etmədi. Amma uşaqlıqdan Vətənə, ailəyə çox bağlı, canıyanan, istiqanlı uşaq olub”.

Ana həmçinin deyir ki, Rəhman şəhid olduğu günə qədər bizimlə telefon əlaqəsi saxlayıb. 44 günlük müharibəni qanıyla, canıyla son gününə qədər döyüşüb. Rəhman minamyotçu olub: "Yaxın zamanlarda çox ağır əməliyyat keçirmişdi, həkimlər ona icazə vermirdi cəbhəyə getməyə. Amma o, özü könüllü olaraq gedib ön cəbhəyə. Hətta döyüş yoldaşları deyir ki, Rəhmana nə qədər deyirdik ki, ağır şey olmaz sənə. Rəhman bütün bunlara məhəl qoymurdu, ağır mərmiləri qucağında daşıyırdı. Şəhid olduğu günü də, səngərdə yoldaşlarıyla birgə olub. Yanlarında partlayan minomyot qəlpəsinin ağ ciyərini zədələməsi nəticəsində şəhidlik zirvəsinə ucalıb”.

Şəhidlik adi ölüm deyil, Vətən, torpaq, böyük amallar uğrunda candan keçmək, özünü şüurlu şəkildə qurban vermək deməkdir. Şəhidlik verilmiş ömür payını gələcək nəsillərin xoşbəxtliyinə bağışlamaqdır.

İstər son 44 günlük müharibədə, istərsə də birinci Qarabağ müharibəsindən indiyədək Vətənin bütövlüyü uğrunda canlarını fəda edən mərd oğullarımız qəlblərdə heç zaman enməyəcək taxt tac qurdular.

Xədicə Səxavətqızı

Xeberle.com