Vətən Müharibəsində Azərbaycanın ərazi bütövlüyü uğrunda canından keçən qəhrəmanlardan da biri Sumqayıt şəhər sakini Qubat Hüsür oğlu Əliyevdir. Yaşasaydı, bu gün 27 yaşını qeyd edəcəkdi Qubat.
Xeberle.com xəbər verir ki, Qubat Əliyev 1994-cü il fevralın 4-də Sumqayıt şəhərində anadan olub.
2001-ci ildə Sumqayıt şəhər 8 nömrəli orta məktəbdə 1-ci sinfə gedib. 2010-cu ildə orta məktəbi bitirib və Sumqayıt şəhər 1 nömrəli Peşə Liseyində təhsilini davam etdirib. 2013-cü ildə hərbi xidmətə çağırılıb və Ağdam rayonunda xidmət edib. Hərbi xidməti dövründə baş atıcı və tuşlayıcı vəzifələrini icra edib.
General Polad Həşimovun şəhid olmasından sonra evdə qərar tuta bilməyib və səfərbərlik idarəsində könüllü kimi qeydiyyatdan keçib. Vətən Müharibəsi başlayandan 11 gün sonra, oktyabrın 9-da yenidən ordu sıralarına çağırılıb. Qubadlı, Ağdərə və Xocavənd istiqamətində gedən ağır döyüşlərdə öz xüsusi bacarığı ilə seçilən qəhrəmanlardan biri olub.
Atası Hüsür Əliyev deyir ki, oğlunun igidlik göstərdiyi son döyüşü Xocavənd rayonunda - Qırmızı Bazar istiqamətində Şuşaya doğru olub: "Polad Həşimov şəhid olandan sonra getdi könüllü yazıldı ki, müharibə olasıdır. Torpaqlarımızı almalıyıq, mən gedəcəm döyüşə. Danışırdıq. Deyirdi, Füzulidəyik, Xocavənddəyik. Çox yerlərin adını bilmirdi, meşələrdəyik deyirdi”.
Şuşanın alınması uğrunda gedən qızğın döyüşlərdə Qubat dağın başında yerləşən mövqedə düşmənə sarsıdıcı zərbələr endirib. "Ana, bizi təbrik edə bilərsən. Biz artıq Şuşadayıq. İllər sonra Şuşanın azad etdik". Şuşa xəbərini anası Nigar xanıma çatdıran Qubad telefon danışığından 2 saat sonra Şuşa yüksəkliyində qəhrəmancasına şəhid olub: "Elə gedəndən əlaqə saxlayırdı bizlə. Hər şeyin yaxşı olacağını deyirdi. Ayın 8-i idi. Saat 1 olardı. Zəng elədi, televizora baxın mama. Təbrik eləyirəm sizi. Mesaj yazdı, siz də bizi təbrik edə bilərsiniz, Şuşa da alındı. Son danışığı o oldu”.
Atası Hüsür Əliyevin sözlərinə görə, oğlu sonuncu dəfə onunla soyuq danışıb: "Ayın 8-i səhər-səhər idi, zəng elədi. Dedi, ata, Şuşanı aldıq. Təbrik eləyə bilərsən bizi. Təbrik eləyirəm sizi. Sabah da bizi buraxacaqlar, gələcəm. Get, Prezidentimiz danışacaq günorta saat 1-də. Dedim, hə, yaxşı, gedib baxacam. Gəldim baxdım. Saat 14:42-də bir də zəng elədi. Dedi, ata baxdın? Dedim, hə. Dedi, sağ ol, mən hündürlüyə qalxıram, vaxtım azdır. Nə isə gördüm, soyuq danışdı”.
Qubat uşaq vaxtlarından vətənə, torpağa bağlı olub. Torpaqlarımızın işğalı ilə heç cür barışa bilməyib. Əmisi Saday Əliyev deyir ki, Qubad işğal altında olan ərazilərimizin azad olunmasını səbirsizliklə gözləyirmiş: "O, heç vaxt Vətənin, torpaqlarımızın işğalda olmağı ilə barışa bilmirdi, özünə bağışlaya bilmirdi. Erməni kimdir ki, gəlib bizim torpaqları alıb. 10 milyon bizik, 2 milyon erməni bizim torpaqları alsın. Mən heç özümə sığışdıra bilmirəm”.
Qardaş itkisi bacı üçün çox ağır olsa da, onun vətən uğrunda şəhid olması ilə təsəlli tapır Sara Əliyeva: "Bu gün onun doğum günüdür. İlk aydır, ilk tarixdir ki, onsuz keçiririk. Hər il fevralın 4-ü mən iki gün öncədən gəlirdim. Böyük bir həvəslə. İndi isə gəlmişəm, amma o yoxdur. Onsuzam. Dünyam qardaşım, dünyamı qaraldan qardaşım. Cənnətdəki yaşın mübarək. Sənsiz çox darıxıram. Sən mənim döyünən ürəyim idin. Sən mənim üçün yaşayırsan, yaşayacaqsan. Kaş ki, yanımda olardın”.
Oktyabrın 9-da müharibəyə gülə-gülə gedən Qubatın noyabrın 9-da ailəsinə şəhid olmaq xəbəri gəlir. Qubat Əliyev Sumqayıtın Şəhidlər Xiyabanında dəfn olunub. Prezident İlham Əliyevin sərəncamı ilə ölümündən sonra "Vətən uğrunda” və "Xocavəndin azad olunmasına görə” medalları ilə təltif edilib.
2016-cı ildə ailə həyatı quran Qubatın bir oğul övladı yadigar qalıb. Qoxusuna doya bilmədiyi övladı indi Vətənə əmanətdir. Gözün arxada qalmasın, Şəhidim!
Xəbərdən istifadə edərkən istinad etmək vacibdir.
