Xeberle.com xəbər verir ki, onlardan da biri Nurlan Nuruzadədir.

Nurlan Tofiq oğlu Nuruzadə 2001-ci ilin avqust ayının 9-da Sumqayıt şəhərində doğulub.Ailədə 3 bacı, 3 qardaş olan Nurlan evin sonbeşiyi olub. Sumqayıt şəhər 17 saylı orta məktəbdə təhsil alıb. 2019-cu ilin oktyabr ayında həqiqi xidmətə çağırılıb və Ağcabədidə yerləşən "N” saylı hərbi hissədə xidmətə başlayıb. Sonra hərbi xidmətini Beyləqanda davam etdirən Nurlan topçu idi.

Zabitlər tərəfindən həmişə təqdir görən gənc topçu, əsgər yoldaşları arasında da hörmət sahibi olub. Vətən Müharibəsinin ilk günündən döyüşlərə cəlb olunan topçumuz, Füzuli istiqamətində gedən ağır döyüşlərdə – 2020-ci il oktyabrın 1-də şəhidlik zirvəsinə ucalıb.

Hərbi xidmətə yola düşməsinin 1 ili tamam olan ərəfədə şəhadət şərbəti içən Nurlan böyüyüb boya-başa çatdığı Sumqayıt şəhərinin Şəhidlər Xiyabanında torpağa tapşırılıb.

Oğlunun ölümünə dözə bilməyən ana Minaxanım Nuriyeva da 3 ay sonra vəfat edib. Ailə Nurlanın 3 yaşından- 16 ildir ki, Sumqayıt şəhərində köhnə mebel sexində, şəraitsiz bir yerdə yaşayır. İkinci Qarabağ müharibəsinin Sumqayıt şəhərindən 7-ci şəhidi olan Nurlan çətin şəraitdə böyüyüb, başa çatsa da, çox mərd və qorxmaz olub.

Bacısı İlahə Nuriyeva deyir ki, anam Nurlanın itkisinə dözə bilmədi. Bizə qonşular deyirdi ki, gecələr sizin xəbəriniz olmur, anan Nurlanın yaşadığı mikrorayonda qoyulmuş portretinin qarşısında saatlarla ağlayır: «Hətta dəfələrlə olub ki, səhərləri anamın naləsinə ayılmışam. Nurlan topçu idi, heç nədən qorxmazdı. Müharibə zamanı da komandirlərinin yaddaşında igid və cəsur əsgər kimi iz qoyub”.

Hər gün onlarla vətəndaşımız, özəlliklə yeniyetmə və gəncimiz Sumqayıt Şəhidlər Xiyabanını ziyarət edir, Nurlanın, bütün şəhidlərimizin ruhuna dualar oxuyur, onların həyat yolu ilə maraqlanır və öyrənir. Daha 19 yaşındaykən belə aqibət hər kəsə nəsib olmur. Əlbəttə, həyatlarının ən gözəl və gənc yaşlarında şəhidlik zirvəsinə ucalan oğullarımızın da ruhu şaddır. Çünki onların uğrunda şəhid olduğu torpaqlarda buğun üçrəngli müqəddəs bayrağımız dalğalanır. Şəhidlərimizin qanı yerdə qalmayıb. Azərbaycan ordusu 44 gün içində xalqımıza möhtəşəm qələbə yaşadıb.

Bütün qoşun növlərimizin özünəməxsus xidmətləri ilə tarixi zəfərimizə töhfələr verdiyi 44 gün içində məhz qoşunlar arasında yüksək səviyyəli əlaqə, vahid komandanlıq altında birlik xüsusi rol oynayıb. Ali Baş Komandanımızın dəfələrlə vurğuladığı kimi, Ordumuz çağdaş tələblərə uyğun səviyyədə təchiz olunduğu texnika, texnologiyadan faydalanıb, lakin torpaqları azad edən, bayrağı qaldıran ƏSGƏRdir! O əsgərlərdən, topçulardan biri idi Nurlan! Adında, soyadında da keçən nuru əbədi ünvan seçən 19 yaşlı şəhid Nurlanın özü ruhu həmişə əzizdir. Onun ailəsi də bizimçün əzizdir.

Vətən sağ olsun! Gənc övladı şəhid olan anaların məğrur durduğu ölkənin bayrağı enməz! Bayrağımız, dövlətimiz, Vətənimiz var olsun!

Xədicə Səxavətqızı

Xeberle.com