Xeberle.com xəbər verir ki, şəhid Nadir də əmisi Nadirin adını daşıdığı kimi, onunla eyni taleyi yaşayıb.

Şəhidin nənəsi Sürəyyə Rzayeva nəvəsinin 26 il sonra əmisinin qisasını yerdə qoymadığını söyləyib: "Mən buna şükür edirəm. Balam torpaq uğrunda getdi, əmisinin qanını yerdə qoymadı. Mənim oğlum Nadir şəhid olandan sonra təskinliyi nəvəm Nadirdə tapmışdım. Amma o da əmisi ilə eyni taleyi yaşadı, onun yolunu getdi. Oğlum Nadir 1994-cü ildə yaralı komandirini döyüş meydanlndan çıxararkən düşmənin snayper hədəfinə tuş gəlmişdi. Son damla qanına qədər Vətən yolunda vuruşub. Nəvəm Nadiri də elə körpəliyindın mən saxlamışam. Onunla nəfəs alırdım. Nəvəm Nadir 2016-cı ildən öz istəyi ilə hərbi də qalmışdı. Müddətdən Artıq Xidmət Edən Hərbi Qulluqçu idi. 44 günlük müharibənin ilk günlərindən döyüş meydanında olub. Kəşfiyyatçı komandiri idi, amma mənə demirdi kəşfiyyatçı olduğunu və ön cəbhədə döyüşlərdə iştrak etdiyini. Hər gün mənimlə telefonla əlaqə yaradardı, danışardıq, deyirdi hərbi hissədəyəm, döyüşlərə getməmişəm. Bir dəfə danışığımızda dedim Nadir mənə düzünü de, döyüşlərdəsən? Mənə dedi ki, nənə düzünü desəm ürəyin dözəcək? Həmin günki telefon danışığımızdan mən bildim ki, Nadir ön cəbhədədir. Füzulidə- eyni əmisinin şəhid olduğu yerdə nəvəm Nadir də şəhadətə ucalıb. 2 həftə nəşi neytral zonada qalıb, oktyabr ayının 31-də Sumqayıt şəhər Şəhidlər Xiyabanında əmisi Nadirlə eyni cərgədə dəfn olunub. Nəvəm Nadir də əmisi kimi qorxmaz, mərd, ağıllı idi. İstədiyi qız var idi, məni onlara elçi də göndərmişdi. Bütün şəhidlər qarşısında baş əyirəm. Çox şükür ki, bu gün Qarabağımız azad olundu. Övladlarımın qisası alındı. Əmisi də şəhid oldu, balası da”, - deyə bildirib.

Şəhid Nadir Rzayev müharibənin ilk günündən könüllü olaraq döyüşlərə qatılıb. Məqsədi Vətən torpaqlarını azad etmək, şəhid əmisinin qanının yerdə qalmaması idi. Son damla qanınadək savaşdı və buna nail oldu. Müzəffər ordumuz isə onun qanını artıqlaması ilə almış oldu.

Qonşuları da Nadirin vətənə bağlı övlad olduğunu deyib: "həmişə deyərdi ki, əmimin qisasını alacam. Torpaqlarımız düşmən tapdağında niyə qalmalıdı. Müddətdən artıq hərbi qulluqçu kimi işləməyə başladı. Goranboyda xidmət edirdi. Buradan könüllü müraciət edib ki, döyüşməyə gedirəm. Füzuli istiqamətində döyüşüb. Orada da şəhid oldu. Oktyabrın 31-də şəhid xəbəri gəldi. Həmişə çətinliyi olanların köməyinə çatardı, istəmirdi ki, kimsə əziyyət çəkə”, - deyə qonşular bildirdi.

Rzayevlər ailəsi hər gün şəhidlərin məzarını ziyarət edirlər. Nənəsi əmi Nadirin xatirəsini əbədiləşdirmək üçün yaşadıqları mikrorayonda su çeşməsi tikdirib və bildirdi ki, nəvə Nadirin də adını əminin yanında əbədiləşdirəcək.

N. Rzayev ölümündən sonra "Vətən uğrunda” və "Füzulinin azad olunmasına görə” medalları ilə təltif edilib.

Xədicə Səxavətqızı

Xeberle.com