Hər bir insanın sağlam yaşaması üçün öncə onun yaşadığı şəhər və ya kəndin ekoloji durumu mühüm əhəmiyyət kəsb edir. Təəssüflə qeyd edək ki, bu fikirləri Sumqayıt şəhəri haqında deyə bilməyəcəyik. Çünki buna Sumqayıt sakinləri tərəfindən edilən şikayətlər imkan vermir. Videosüjetdə görəcəyiniz ərazi Sumqayıtın çıxışında yerləşən və şəhərin bütün tullantılarının atıldığı xüsusi poliqondur.

Lakin hər gün sözügedən ərazidə zibilliyin yandırılması 500 minə yaxın Sumqayıt sakininin həyatını sözün əsl mənasında cəhənnəmə çevirib. Belə ki, sakinlər səhər və axşam saatlarında şəhəri bürüyən gözçıxaran, baş ağrıdan qoxudan dəhşətli dərəcədə əziyyət çəkdiklərini söyləyirlər. Hətta bəzi hallarda bu iy evlərin içinə qədər daxil olur.    

Tüstü iyinin şəhəri bürüdüyü ilk günlərdə Ekologiya və Təbii Sərvətlər Nazirliyi və digər qurumlar bunu hansısa müəssisəsinin atmosferə atdığı tullantılarla əlaqələndirməyə çalışırdılar. Lakin AzadXeber əməkdaşlarının araşdırması nəticəsində bu iddianın hələlik özünü doğrultmadığını aşkarlandı.  

Sakinlərin şikayətinə əsasən məsələyə aydınlıq gətirmək üçün Sumqayıt Şəhər Təmizlik Departamentinə üz tutduq.   Departamentin rəhbəri Rahim Mustafayevin sözlərinə görə, sözügedən poliqon ərazi bərk tullantıların zərərsizləşdirilməsi üçün nəzərdə tutulub. Lakin gördüklərimizdən hər şeyin deyilən kimi olmadığınının şahidi olduq. Çəkiliş etdiyimiz zaman əraziyə tullantı ilə dolu olan yük avtomobilinə yaxınlaşdıq. Həmin yük maşınının hansı şirkət və yaxud da müəssisəyə aid olduğunu öyrənməyə çalışsaq da, heç bir nəticə əldə edə bilmədik. 

Lakin tullantılara diqqət etdikdə heç də Rahim bəyin dediyi kimi bərk materiallara rast gəlmədik. Əsasən plastik və kağız məmulatlarından ibarət olan tullantılar fəhlələr tərəfindən əraziyə boşaldılırdı. 

Rahim Mustafayev onu da bildirdi ki, yaxın zamanlarda sözügedən problemin həll etməyə çalışacaqlar. 

Ümid edirik ki, problemlə bağlı adiyyəti orqanlar da lazımi addımlar atacaq və Sumqayıt şəhər sakinləri də  təmiz hava almaq haqqından faydalana biləcəklər.

(azadxeber.net)