Sumqayıt şəhərinin 76-cı məhəlləsində kanalizasiya suyu açıq şəkildə küçədən axıdılır. Ərazidə içməlı su şəbəkəsi yoxdur. Çirkab su isə evləri basır, üfunətdən dayanmaq mümkün deyil.
Şəhərin Hafis Baxış küçəsində yaşayan sakinlər bildirir ki, ərazidə ümumiyyətlə kanalizasiya xətti yoxdur. İçməli su şəbəkəsindən isə söhbət gedə bilməz. Evlər qamışlığın və çırkab suyun girdabında batır.
Sakinlər problemləri ilə bağlı dəfələrlə aidiyyəti qurumlara müraciət ünvanlayıblar. Ancaq hələ də nəticəsi yoxdur.
Məsələyə "Azərsu" ASC-nin mətbuat xidmətinin rəhbəri Anar Cəbrayıllı aydınlıq gətirib. O deyib ki, ərazidə infrastruktur yoxdur. Fərdi şəkildə çəkilmiş xətlər isə tikinti qaydalarına ziddir.
Ərazidə mərkəzləşdirilmiş kanalizasiya infrastrukturunun qurulması isə Abşeron yarımadasının baş planına əsasən nəzərdə tutulub və gələcəkdə icra olunacaq layihələr çərçivəsində həyata keçiriləcək.
Xəbərdən istifadə edərkən istinad etmək vacibdir.
