Bugünlərdə Sumqayıt Bulvarının ərazisində xüsusi zolaqdan kənarda velosiped sürənlərin 30 AZN məbləğində cərimə olunacağı barədə xəbərdaredici löhvə quraşdırılıb. Bu qayda Sumqayıt şəhər "Bulvar İdarəsi" tərəfindən tərtib edilib.
Maraqlıdır, bu idarənin vətəndaşları cərimə etmək kimi səlahiyyəti varmı?
Məsələ ilə bağlı vəkil Elşad İsayev Xeberle.com-a şərh edib. O bildirib ki, Dənizkənarı Bulvar İdarələrinin fəaliyyətinin təmin edilməsi haqqında Azərbaycan Respublikası Prezidentinin fərmanına uyğun olaraq bulvar idarələri təsis olunmuş, bununla bağlı Nazirlər Kabineti Sumqayıt Şəhər İcra Hakimiyyəti başçısının tabeliyində "Sumqayıt Bulvarı" Məhdud Məsuliyyətli Cəmiyyətinin yaradılması haqqında qərar qəbul edib və bu qərara əsasən Sumqayıt şəhərindəki dənizkənarı bulvarın infrastrukturunun qorunub saxlanılması, ekoloji təhlükəsizliyinin təmin edilməsi, habelə onun idarəetmə sisteminin təkmilləşdirilməsi, ərazidə nəzarətin təmin edilməsi məqsədi ilə Sumqayıt ŞİH başçısının tabeliyində "Sumqayıt Bulvar" Məhdud Məsuliyyətli Cəmiyyəti yaradılıb:
"Bulvar İdarəsi öz fəaliyyətində Azərbaycan Respublikasının Konstitusiyasını, Azərbaycan Respublikasının qanunlarını, bu Nizamnaməni, Azərbaycan Respublikası Prezidentinin digər fərman və sərəncamlarını, Azərbaycan Respublikası Nazirlər Kabinetinin qərar və sərəncamlarını, digər normativ hüquqi aktları rəhbər tutur. Bulvar İdarəsi ümumdövlət və ictimai əhəmiyyət daşıyan fəaliyyətlə məşğul olur. Bulvar İdarəsi bu Nizamnamədə qarşıya qoyulmuş məqsədlərə nail olmaq üçün sahibkarlıq fəaliyyəti ilə məşğul ola bilər.
Azərbaycan Respublikası Prezidentinin 2018-ci il 31 iyul tarixli 223 nömrəli Fərmanı ilə təsdiq edilmiş nizamnaməyə uyğun olaraq Bulvar İdarələrinin fəaliyyətinin məqsədi bulvar ərazisinə nəzarət və onların idarə edilməsi, saxlanılması, cari fəaliyyətinin və perspektiv inkişafının təmin edilməsi sahəsində fəaliyyət göstərməkdir.
Bulvar İdarəsinin fəaliyyət istiqamətləri aşağıdakılardır:
1. Müvafiq sahənin inkişafını təmin etmək;
2. Müvafiq sahədə vahid dövlət siyasətinin formalaşmasında iştirak etmək və bu siyasətin həyata keçirilməsini təmin etmək;
3. Müvafiq sahədə nəzarəti həyata keçirmək;
4. Müvafiq sahəyə aid proqnozlaşdırma və planlaşdırma işlərini təşkil etmək.
Müəyyən edilmiş fəaliyyət istiqamətlərinə uyğun olaraq, Bulvar İdarəsinin vəzifələri aşağıdakılardır:
1. Parka aid olan proqram və inkişaf konsepsiyalarını hazırlamaq və həyata keçirmək;
2. Park ərazisinə nəzarəti həyata keçirmək;
3. Park ərazisində yerləşən xüsusi ekoloji, tarixi, estetik əhəmiyyət daşıyan təbiət və mədəniyyət obyektlərdən, xüsusi əhəmiyyətli obyektlərdən istifadə rejimini təmin etmək, onların qorunması, istifadə qaydalarının, mühafizə rejiminin pozulmasının qarşısının alınması və təqsirkar şəxslərin məsuliyyətə cəlb edilməsi ilə əlaqədar zəruri tədbirlər görmək;
Göründüyü kimi bulvar idarələrinin, o cümlədən "Sumqayıt Bulvar" MMC idarə etmə, saxlanılma və inkişafın təmin edilməsi, mühafizə rejiminin pozulmasının qarşısının alınması, nəzarət və təqsirkar şəxslərin məsuliyyətə cəlb edilməsi ilə əlaqədar zəruri tədbirlər (məsələn hər hansı qayda pozuntusu, hüquq pozuntusu və. s hallar baş verdikdə) görməklə məhdudlaşır. Yəni bulvar idarəsi bu və ya digər hüquqi və fiziki şəxsləri inzibati məsuliyyətə, cinayət məsuliyyətinə və sair cəlb etmək, cərimə etmək, fiziki və hüquqi şəxslərin üzərinə əmlak məsuliyyəti qoymaq və digər hüquqları yoxdur.
Qanuna uyğun olaraq, Bulvar İdarəsininn əqdlər bağlamaq, öz adından əmlak və qeyri əmlak hüquqları əldə etmək və həyata keçirmək hüququ, həmçinin vəzifələri vardır. Bulvar İdarəsi məhkəmədə iddiaçı və ya cavabdeh qismində çıxış edə bilər.
Xədicə Səxavətqızı
Xəbərdən istifadə edərkən istinad etmək vacibdir.
