Sumqayıt şəhər "Xəzər bağları” massivi, Nəsimi küçəsi, 2-ci məhəllədə yaşayan sakinlər Xeberle.com saytına şikayətlə müraciət ediblər. Sakinlər şikayətlərində yaşadıqları ərazidə insanın normal yaşaya bilməsi üçün vacib olan şəraitin olmadığını bildiriblər.

Vəziyyətlə yaxından tanış olmaq üçün Xəzər bağları massivindəki həmin ünvana, "Qamışlıq” deyilən əraziyə yollandıq. Gördüklərimizdən dəhşətə gəldik.
Təsəvvür edin ki, içməli su xətti kanalizasiya xətti ilə qarışıb. Ərazi kanalizasiya sularına qərq olub. Sakinlər kanalizasiya suyunu süzüb çay hazırlayırlar. Hətta kirli, paslı suda paltar yumağa məcbur olanlar da var. Yollar kanalizasiya sularının altında qaldığından zığ-palçıq içərisində olan yollardan maşınlar da keçə bilmir. Bu üzdən ikinci məhəllə sakinləri təcili yardıma ehtiyac olanda maşınların əraziyə daxil ola bilməməsi üzündən tibbi yardımdan belə məhrum qalırlar. Rütubətdən evdə oturmaq bir yana, üfunət qoxusundan beyin çatlayır. Nəmişlik səbəbindən evlərin həyəti kərtənənkələ, qurbağa, hətta ilan məskəninə çevrilib. Sakinlərdən biri bizimlə söhbəti zaman çayın içərisindən kərtənkələ çıxdığını bildirdi. Məhəllədə zibil yeşikləri belə yoxdur. Ərazinin yolları zibillik içərisində itib-batır. Elektrik naqilləri də düzgün quraşdırılmayıb. Güclü külək əsən kimi naqillər qırılıb-tökülür. Naqillərin qırılıb evlərin üzərinə düşməsi üzündən məhəllədə bir neçə dəfə yanğın baş verib.
Tanınmış jurnalist Lalə Məftunə də ərazinin sakinlərindəndir. Lalə xanım Sumqayıt şəhər İcra Hakimiyyətinə məhəllənin bərbad vəziyyəti ilə bağlı müraciət etdiklərini söylədi. Şəhər İcra Hakimiyyətindən əraziyə gəlib baxıb, problemlərlə yaxından tanış olacağıq desələr də, hələlik bir xəbər-ətər yoxdur.

Ərazidən geriyə - Sumqayıtın mərkəzinə döndükdən, 2 saat ərzində ayağımızın palçığını təmizlədikdən sonra, əvvəl şükür etdik, sonra da istər-istəməz şübhəylə düşündük, yəni ora da 21-ci əsr Sumqayıtının bir hissəsidir və orada da sumqayıtlıların bir hissəsi yaşayır?

Kamran Kazımzadə
Türkan Heydərova

P.S. Ümidvarıq ki, tezliklə Sumqayıtın bu hissəsindəki problemlərə şəhər rəhbərliyi çərçivəsində reaksiya veriləcək və problem hissə-hissə yoluna qoyulacaq. Əks halda düşünürük ki, o ərazidə yaşayan sumqayıtlılar ya ilanlara yem ola-ola, ya baş verə biləcək yanğın nəticəsində, əraziyə girə bilməyən təcili tibbi yardım avtomobillərindəki həkimlərin "müdaxiləsizliyindən”, yaxud da kanalizasiya suyundan zəhərlənərək "hissə-hissə” qırılacaqlar.