Yerli KİV-də Sumqayıt şəhəri Hacı Zeynalabdinn qəsəbəsi Fərrux ağa Qayıbovun adını daşıyan parkın baxımsız vəziyyətdə olduğu ilə bağlı məlumat yayılıb.
Xeberle.com xəbər verir ki, yayılan məlumatlarda parkda olan bulağın uzun müddətdir təmirsiz vəziyyətdə olduğu, ərazidə olan oturacaqların qırıldığı, piyadalar üçün nəzərdə tutulan səkilərin isə bərbad halda olduğu yer alıb. Həmçinin o da bildirilir ki, parkda yığılan tullantılar vaxtında daşınmır.
Məsələ ilə bağlı Sumqayıt şəhər İcra Hakimiyyəti Başçısının Hacı Zeynalabdin qəsəbəsi üzrə icra nümayəndəsi Lalə Hacıyeva Xeberle.com-a yaranan vəziyyətə belə aydınlıq gətirib: " Tullantılar saatla vaxtında daşınır. Qəsəbə ərazisində Fərrux Qayıbov adına park deyil, küçə var. Burada olan yaşayış binaları və digər obyektlər hərbi şəhərcik ərazisində yerləşir. Vətəndaşlar tərəfindən müraciətlər olur, amma hərbi şəhərcik ərazisi olduğu üçün onlara kömək edə bilmirik. Həmin ərazilər birbaşa Müdafiə Nazirliyinin balansındadır".
L. Hacıyeva qəsəbə ərazisində, o cümlədən Şirvan yaşayış massivində 64 yaşayış binasının dam örtüyünün yenilənidiyi də deyib.
İcra nümayəndəsi qəsəbə ərazisində Mikayıl Müşfiq və Hacı Zeynalabdin Tağıyev parklarının oldğunu da sözlərinə əlavə edib: "Mikayıl Müşfiq parkı var, həmin ərazini şəxsi vəsaitim hesabına təmir etmişəm. Hazırda park ərazisində İkinci Qarabağ müharibəsi şəhidlərinin də barelyeflərinin yerləşdirilməsi işi aparılır. İkinci parkımız isə, Hacı Zeynalabdin Tağıyev adına parkdır".
Məsələyə aydınlıq gətirmək üçün Müdafiə Nazirliyinin 1 saylı Evlər İdarəsi ilə əlaqə saxlamağa çalışdıq. Oradan isə telefon zənglərimizə cavab verən olmadı.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
