Sumqayıtda fəaliyyət göstərən "Unikal" klinikasının pediatrı Rəşad Həsənov son aylarda uşaqlar arasında artan infeksion xəstəliklər barədə danışıb.
Mətni olduğu kimi diqqətinizə çatdırırıq:
Son günlərdə uşaqlar arasında infeksion xəstəliklərin sayı xeyli dərəcədə artıb. Lakin bu dövrə uyğun olaraq - payızdan qışa, yazdan yaya keçid olan dönəmlərdə xəstəliklər hər zaman çoxalır. Bakterial və virus infeksiyaları yayılır. Bu dönəmdə isə, fərqli virusların da olması mümkündür. Bunlar özü də hər bir uşaqda fərdi şəkildə büruzə verə bilər. Qızdırma, burun axıntısı, ishal, əsasən də kollektivdə olan uşaqlarda - bağça və məktəbə gedən uşaqlar - azyaşlılar arasında daha çox rast gəlinir. Virus infeksiyalarında qabaqlayıcı tədbir kimi çox miqdarda dava-dərmana ehtiyac yoxdur, çünki hər bir virus infeksiyasının özünəməxsus gedişatı olur. Adətən 3-4 gün hərarət olur və müayinə zamanı uşağın ümumi vəziyyətində bir dəyişiklik olmazsa, qızdırma salan dərmanlarla idarə etmək mümkündür. Uşaq tez-tez xəstələnirsə, ümumi müayinə olunur, patoloji bir vəziyyət müşahidə olunarsa, aradan qaldırılmalıdır ki, tez tez xəstələnməsin.
Tibdə belə bir qayda var, hər bir uşaq ay ərzində iki dəfə xəstələnə bilər. Lakin pandemiya şəraitində olmağımız və virusların artdığı bir fəsildə olmağımız hesabına bu 4 dəfəyə qədər arta bilir. Bir virusdan sağalan uşaq, kollektiv içinə gedib yenidən ayrı virusa yoluxur. Sadəcə, mümkün qədər qabaqlayıcı tədbir olaraq, xəstələnmiş uşaqlar ən az 2 həftə kollektiv içinə getməməlidir. Bəzən valideynlərin iş rejimindən asılı olaraq uşağı evdə saxlaya bilməyən valideyn 3-5 gün sonra qızdırmanı salandan sonra yenidən bağçaya aparır. Bununla da tam sağalmayan uşaq kolkektivə qayıdıb sağlam uşaqları da yoluxdurmuş olur. Yayılmanın kəskin artması da bu səbəbdən baş verir.
Hazırda valideynləri narahat edən əsas mövzulardan biri də COVID-19 virusu barədədir. Onun fərqli gedişatı olduğundan və uşaqların da immun sistemi tam formalaşmadığına görə infeksiyalara qarşı çox həssas olmur, yoluxan azyaşlılar 3-4 gün hərararət, qarınişləmə, burun axıntısı ilə sağala bilir. Sadəcə bu dönəmdə uşaqlar ciddi daşıyıcı rolunu oynayırlar. Böyüklərin yoluxmasına, ağırlaşmış hal almasına səbəb ola bilirlər. Maksimal dərəcədə uşaqları qorumaq lazımdır. Bunun üçün sıx kollektivlərdən, havalandırması olmayan yerlərdən mümkün qədər uzaq olmaq ən vacib amildir.
Xəbərdən istifadə edərkən istinad etmək vacibdir.
