Bu yazını yazmaq üçün tam bir ay gözlədim ki, 31 dekabrda Şaxta babadan bir arzu diləyim. Saatlar tam 24:00 olduqda Şaxta babadan arzuladım ki, nolar, 2022-də biz sumqayıtlılara normal bir nəqliyyat sistemi bəxş elə. Çünki aidiyyəti qurumlardan əlimiz tamam üzülüb. Bu qurumların başımıza açmadığı oyun qalmadı. Amma Şaxta baba ideal nəqliyyat sistemi qurub. Maralları ilə öz kirşəsini dünyanın hər nöqtəsinə sürür? Sürür. Bütün hədiyyələri gecə saat 12-dək paylayıb çatdırır? Çatdırır. Özü də qəzasıs-filansız, vaxtında evə çatdırılma. Handa bir pizza satıcıları bu dəqiqliklə işləyə bilmir. İndi isə Sumqayıt sakinlərinin başına açılan nəqliyyat oyunlarından danışaq.
İlk oyun nə zaman başladı? Elan verildi ki, sentyabr ayından etibarən Sumqayıtda marşrutlarda gediş haqqı kart ilə ödəniləcək. Sevindik ki, "Qardaş, iki nəfər çıx” kimi minnət-sünnətdən, "Filankəs düşərsən” kimi dünyanın nadir ölkələrində olan hörmət jestlərindən canımız qurtaracaq. Rahat millət olduğumuza baxmayaraq, camaat əl-ayağa düşdü ki, bəs bu kartları haradan əldə edək?! "Paşabank”ın kartlarını göstərdilər ki, buyurun, bu kart, bu da yüksək xidmət... Xidmət nə xidmət?! Dəhşətizm...
Demək, 2 manat verib kart aldıq, balansa pul da yüklədik, elə ikicə dəfə istifadədən sonra gah avtobusdakı oxuyucu qəbul etmədi kartı, gah da balansdakı pullar yağlı əppəy olub göyə çıxdı. Hara müraciət etdik, bir xeyri olmadı. Şəxsən həmin kart mənə od qoyub, özü də nöyütsüz-kibritsiz. 2 manata aldığım karta 3 manat yüklədim və şəstlə avtobusa yaxınlaşdım ki, oxudub keçim. Kartı oxuducuya yaxınlaşdırdım dəfələrlə, ancaq ödəniş qəbul olunmadı, hələ sıfır balans göstərdi. Az qalmışdı kart oxuyucusu üzümə desin ki, "get balansına pul yüklə də!” Sağ olsun cansız aparat demədi, amma sürücü camaat içində yaxşıca qaraladı məni ki, ay kişi, kartda pul yoxdur da. Mən də ödəniş qəbzini göstərib dedim ki, 10 dəqiqə bundan əvvəl yükləmişəm, necə yəni yoxdur?! Saymazyana şəkildə, "mənim problemim deyil, düş, camaata yol ver” dedi. "Paşabank”a getdim, dedilər ki, kart rəsmi adam deyil deyə balansa baxa bilmərik, Nəqliyyat idarəsinə zəng elədim, dedilər ki, bizlik deyil, gedin banka. Bir sözlə, məni top kimi ora qovdular, bura vurdular, özü də kart işləmədiyi üçün payi-piyadə o idarə sənin, bu idarə mənim.
Keçək növbəti oyuna. Karta pul yükləmək üçün marketlərdə uzun-uzadı növbələr yarandı, ödənişdən xəbəri olmayan insanlar kömək üçün minnətçi olurdular. Pandemiya şəraitində marketlərin girişində, yaxud içərisində və ya küçələrdəki digər ödəniş terminallarının qarşısında bəlkə də neçə-neçə insan mənfur virusa yoluxdu. Budurmu, vətəndaşın qeydinə qalmaq?! Marşrut avtobuslarda kartla ödəmə, ümumiyyətlə isə nağdsız ödəniş üsulu hazırkı vəziyyətdə sanitar-gigiyenik cəhətdən çox səmərəlidir. "Pul əl çirkidir” sözünə gəlin, "Pul çox çirklidir” kimi baxaq. Neçə insanın əlindən keçən pullar xəstəlik mənbəyi deyilmi?
Digər tərəfdən Bakıda kartla ödənişə keçid daha sistemli şəkildə həyata keçirildi. Dayanacaqlarda ödəniş terminalları yerləşdirildi, avtobuslarda kart oxuyucularının proqram təminatı təşkil edildi, hansı kartdan istifadə və balans yükləmə barədə məlumat verildi. Sumqayıtda isə tam əksinə, "urrey” qışqırıb keçirik dedilər, nə bir terminal quraşdırıldı, nə də normal kartlar verildi. Alınan kartların da vəziyyəti ortada. Minlərlə sakinin kart balanslarında pulları batdı, əsəblər gərildi, narazılıqlar başladı. Hələ bir gediş haqqı ödədiyin yerdə təkrar-təkrar pulların çıxılmasını demirəm. Xülasə, oyunun içində idik.
Gördülər ki, gül kimi sistemin içinə zibil etdilər, tez qərar verildi: Sumqayıtın marşrut avtobuslarında kartla ödəmə sistemi dayandırılır və 2022-ci ilin yanvar ayının ortalarından yenidən tətbiq ediləcək. Hoqqasız e, mən ölüm. Mənim bunlara ümidim azdır, Şaxta baba. Odur ki, biz sumqayıtlılara yeni il hədiyyəsi olaraq, normal nəqliyyat sistemi gətir.
Turqut Rzalı
Xeberle.com
Xəbərdən istifadə edərkən istinad etmək vacibdir.
