...Ötən əsrin 1993-cü ilindən danışıram. Azərbaycan od üstündə qazan kimi qaynayırdı. Xalq Cəbhəsi ətrafında birləşən qüvvələr bir yandan, Azərbaycanın bu çətin vəziyyətindən bəhrələnmək istəyən xarici qüvvələr də bir tərəfdən... hamı başını itirmişdi, ölkə düzəndən düşmüşdü. Bir sözlə, özbaşnalıq baş alıb gedirdi. Biz jurnalistlər də öz fəaliyyətimizdə. Yenicə demokratiya qazanmış Azərbaycanın ilk qaranquşlarından olan "168 saat” qəzetini ərsəyə gətirirdik. Təvazökarlıqdan uzaq olsa da, deməliyəm ki, qəzetimiz sözün əsl mənasında yeni söz, yeni nəfəs idi. Və həmin illərin birində Mingəçevir şəhərinə bir toya getdim. Cavan qız –gəlinlər dedilər ki, qonşuluqda bir dalandar qadın var, Allahdan vergilidir. Adamın qismətini, taleyini, başına gələcəkləri deyir. Eləmədim tənbəllik, toy gününün səhəri gedib, adı bəlli Nərgiz xalanı tapdım. Kartını stolun üstünə səpələyib, danışmağa başladı... Elə bil ki, mənimlə qonşuluqda yaşayırdı, elə bil ki, hər gün evimə-gəlib getmişdi. Bir xeyli dərdləşəndən sonra Azərbaycandakı durumla bağlı sual verdim. Dedi ki, qızım, iki-üç ay ərzində hakimiyyətdən getmiş iki adamdan birinin yenidən hakimiyyətə gələcəyi görünür. Ya Ayaz Mütəllibov, ya da Heydər Əliyev. Ancaq Heydər Əliyevin gəlişi daha çox görünür. 1994-cü ildə müharibənin qurtaracağını da dedi.

Atalar deyib ki, fala inanma, faldan da qalma. Mən Mingəçevirdə Nərgiz xala ilə görüşəndə fevral-mart ayları idi. Və qayıdıb "168 saat” qəzetinin 7№ (76) 6 mart 1993-cü il sayında Nərgiz xala ilə olan danışığımızı yazdım. Bu məlumat qəzetdə çap ediləndən sonra başımız bir xeylı ağrıdı. Hətta özümüzün yaratdığımız "168 saat” qəzetini bağladılar. Sonra "7 Gün” qəzetinin sahibi Emin Eminbəyli bizə redaksiyasında yer verdi.
Bundan çox zaman keçmədi. Həmin ilin iyun ayında Heydər Əliyev hakimiyyətə gəldi. Və biz Nərgiz xalanı Sumqayıta dəvət etdik. O, həmin zaman "168 saat” qəzetinin əməkdaşından birinə dedi ki, bu yaxınlarda avtomobil alacaqsan. Biz güldük. Çünki həmin adam quru maaşa dolanırdı, hamımız kimi. Ancaq iki aydan sonra bir biznes işində təsadüfən əli gətirdi, həmin dostumuz özünə avtomobil aldı.

... Hərdən Nərgiz xalanı xatırlayırdım. Lakin ötən ilin sonunda mənə naməlum nömrədən zəng edən adam dedi ki, xanım, Sizi Nərgiz xala axtarır. Əvvəl kim olduğunu bilməsəm də, sonra telefonun o biri başındakı adam xatırlatdı. Uzun müddətdir Azərbaycanda yaşamayan Nərgiz xala hətta məni "Səni axtarıram” verilişi ilə axtarışa vermək istəyib. Nə isə görüşümüz internetlə - Skype vasitəsilə baş tutdu. Söhbətimizin ortasında ona Azərbaycandakı siyasi durum haqqında sual etdim. Cavabı belə oldu: "Azərbaycanı istəyənlər də çoxdur, istəməyənlər ondan da çoxdur. Ancaq ki, bu il Azərbaycan prezidenti torpaqlarımızın yarısını ilin axırına kimi almalıdır. Ondan sonra hamı bayram edəcək. Prezidentimizin şöhrəti daha da çoxalacaq”. İl ərzində ölkədə hakimiyyət daxilində köklü dəyişikliklərin də olduğunu dedi. Və bir neçə söz də dedi ki, onlar baş verəndən sonra yazacağam. Bir söz də söylədi ki... Kaş tez olsa... Bunlar olandan sonra danışaram.

Yazdıqlarım yalan deyil, oxucularıma və qələmimə hörmət edən biri kimi, xahiş edirəm ki, məni ucuz sensassiya dalınca qaçmaqda suçlamayın. Sadəcə 22 il bundan əvvəl verilən proqnoz düz çıxdığına görə, Nərgiz xalanın bu dəfə də dediklərinin çin olmasını istəyirəm, ən azı torpaqlarımızın alınmasına görə.

Aida Eyvazlı
Xeberle.com