Sumqayıt gecələri son vaxtlar çox gözəldir. Sayrışan işıqlar, göz qamaşdıran bina fasadları... Amma söhbət şəhərin mərkəzi küçələrindən gedir. Digər kənar küçələrdə isə gözəllik axtarmırıq, bir azca işıq düşsə, kifayətdir. Bu dəfə şəhərin qaranlıq küçələrindən biri - Zülfi Hacıyev küçəsinin 9-cu mikrorayona düşən tərəfi haqqında danışacağıq, daha doğrusu, göstərəcəyik.
Həmin mikrorayon sakinləri Xeberle.com-a Heydər Əliyev parkıyla 9-cu mikrorayon arasındakı yolun, yol boyu düzülmüş binaların arxasının gecə saatlarında çox qaranlıq olmasından şikayət edirlər. Onlar Küçə İşıqları İdarəsinin Heydər Əliyev parkının giriş hissəsindən Şərq bazarına kimi olan ərazini unutduqlarından gileylənirlər. Əlavə edirlər ki, əsasən zülmət qaranlıq bu yolun Şərq bazarına çatmamış və bazarın arxa hissələrində olur və onlar üçün gecə saatlarında bu ərazidən keçmək qorxulu və təhlükəlidir. Bu küçənin bazara yaxın hissəsindən sola 2 dar yol burulur, şikayətçilər bu yolların da çox qaranlıq olduğunu deyirlər. Sakinlər şəhər rəhbərliyi səviyyəsində bu problemə operativ reaksiya veriləcəyini ümid edirlər.
Sual yaranır, Sumqayıtın hər bir hissəsi onu idarə edənlər üçün eyni dəyərə malik deyilmi? Belə məqamlrda öncə vətəndaşların rahatlığı, təhlükəsizliyi nəzərə alınmırmı?
Problemi diqqətdə saxlayacağıq.
Elnur Ağayev
Fotolar Kamranındır
Xeberle.com
P.S. Hər şey bir yana, qeyd etməliyəm ki, bu ərazi qorxulu, adrenalin dolu film çəkmək istəyən rejissorlar üçün ideal yerlərdən biridir.
Xəbərdən istifadə edərkən istinad etmək vacibdir.
