Sumqayıtda məktəb rəhbəri olmaq istəyənlər üçün müsabiqə elan olunur.
Xeberle.com xəbər verir ki, bu barədə Abşeron-Xızı Regional Təhsil İdarəsi məlumat yayıb.
Abşeron-Xızı Regional Təhsil İdarəsi tabeliyində fəaliyyət göstərən, şagird sayı 500-dək olan və direktor vəzifəsi hazırda vakant olan ümumi təhsil müəssisələrinə direktorların seçimini həyata keçirir. Seçim prosesi cari ilin iyul ayının 15-dək davam edəcək.
Direktor olmaq istəyən namizədlər üçün tələblər:
- pedaqoji ixtisas üzrə ali təhsil;
- 5 ildən az olmayaraq pedaqoji staj
- hazırda ümumi təhsil müəssisəsində pedaqoji fəaliyyət göstərmə.
Seçim zamanı MİQ və ya DQ imtahanında yüksək nəticə əldə etmiş şəxslərə, həmçinin 2021-ci ildə keçirilmiş direktor vəzifəsinə işə qəbul üzrə müsabiqənin test imtahanı mərhələsində uğur qazanmış lakin müsahibədə iştirak etməmiş namizədlərə üstünlük veriləcək.
Namizədlər tələb olunan sənədləri (kadrlar uçotunun şəxsi vərəqəsi, əmək kitabçasının, ali təhsil haqqında sənədin və əlavənin surəti) iyunun 30-dək Abşeron-Xızı Regional Təhsil İdarəsinə təqdim etməlidirlər.
Şagird sayı 150-dək olan məktəblər üzrə müraciət edən namizədlərlə yalnız müsahibə təşkil ediləcək. Şagird sayı 151-500 arası olan məktəblərə müraciət edən namizədlər isə əvvəlcə test imtahanında iştirak edəcək, uğur qazanan namizədlərlə ikinci mərhələdə müsahibə keçiriləcək.
Qeyd edək ki, 2021-ci ildə keçirilmiş direktor vəzifəsinə işə qəbul üzrə müsabiqənin test imtahanı mərhələsində uğur qazanmış (24 baldan yuxarı nəticə göstərmiş şəxslər) lakin müsahibədə iştirak etməmiş namizədlər ilkin mərhələ olan test imtahanından azaddırlar, onlar birbaşa müsahibə mərhələsinə dəvət olunacaqlar.
Keçidə daxil olaraq vakant məktəblərin siyahısı ilə tanış ola bilərsiniz.
Xəbərdən istifadə edərkən istinad etmək vacibdir.
