Uşaqlar üçün rəsm çəkmək özünü ifadə etmək imkanı, ətrafımızdakı dünyanı öyrənməyin yollarından biridir.
Əsərləri müxtəlif sərgilərdə nümayiş olunan və ilk mükafatlarını qazanan 15 yaşlı sumqayıtlı rəssam Xədicə Səlimli də bu sahədə istedadı ilə seçilir.
Yeniyetmə rəssamın anası Xavər Kərimova Xədicənin rəngləri mənalandırmasını və ifadə etmə cəhdlərini o, hələ 2 yaşında olarkən hiss edib. Sonralar Xədicənin öz sevimli məşğuliyyətinə aludə olduğunu görüb və onu Sumqayıt şəhərinin 5-ci mikrorayonunda yerləşən Uşaq və Gənclərin Yaradıcılıq Mərkəzinə aparıb.
Xədicənin müəllimi Rəşidə Bağırova isə deyir ki, şagirdi hələ 6 yaşından rəsm çəkməyə başlayıb. O, Xədicənin ilk rəsm əsərlərini xatırlayır: "Xədicənin rəsmlərində solğun və parlaq rənglərin yaratdığı ahəngin fonunda ifadə olunan mövzu axtarışları gördüm. Əmin oldum ki, bu uşağın həqiqətən də istedadı var. Qarşımda onun "əl işləri” dururdu. Burada rəqəmlər bir cərgədə düzülmürdü. Bunlar fikrin izahı olan rəsmlər idi”.
15 yaşlı rəssamla söhbət edirik. Mənzərə və natürmot çəkməyi, karandaşla kağız üzərində işləməyi çox sevir və səbəbini belə izah edir: "Karandaş sadədir, gözlərimi qamaşdırmır”.
Yaxın günlərdə Sumqayıt Dövlət Rəsm Qalereyasında Xədicə Səlimlinin fərdi sərgisi keçirilib. Sərgidə rəssamın müxtəlif mövzuda 60-dan çox rəsm əsəri nümayiş olunub. Mütəxəssislərin yüksək qiymətləndirdiyi bu əsərlərin məzmunundakı ortaq ana xətt isə işıqdır...
(Azərtac)
Xəbərdən istifadə edərkən istinad etmək vacibdir.
