Bu gün paytaxtın Nərimanov rayonu ərazisində çoxmərtəbəli binanın damından yıxılaraq ölən şəxs MTN-in polkovnik-leytenant rütbəli zabiti Azər Əliyevdir.

Bu barədə Nərimanov Rayon Prokurorluğundan məlumat verilib.

Baş Prokurorluğun mətbuat xidmətindən verilən məlumata görə isə Bakının Nərimanov rayon sakini Azər Əliyev aprelin 8-də səhər saat 10:00 radələrində yaşadığı Həsənoğlu küçəsi, 6 ünvanında çoxmərtəbəli binanın 7-ci mərtəbəsindən yıxılaraq ölüb.

Faktla bağlı Nərimanov Rayon Prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb, ölümünün səbəblərinin müəyyənləşdirilməsi məqsədilə məhkəmə-tibbi ekspertizası təyin edilib.

Hal-hazırda araşdırma aparılır və xüsusi xidmət orqanları zabitinin ölümünün təfərrüatları aydınlaşdırılır. 

*   *   *16:16

Nərimanov Rayon Prokurorluğundan intihar faktını təsdiq etsələr də bu barədə əlavə açıqlama vermək və mərhumun soyadını açıqlamaq istəmədilər.

Prokurorluqdan verilən məlumata görə, belə bir intihar hadisəsi doğrudan da baş verib. Prokurorluqdan o da bildirildi ki, faktla bağlı Cinayət Məcəlləsinin 125-ci (intihar həddinə çatdırma) maddəsi ilə cinayət işi açılıb və araşdırma aparılır.

Virtualaz.org

*   *   *15:45

Bu gün günortaya yaxın MTN-in əməkdaşı Bakının Nərimanov rayonunda, Həsənoğlu küçəsində yerləşən çoxmərtəbəli binadan özünü ataraq, faciəli şəkildə dünyasını dəyişib. 

Məlumata görə, 35-37 yaşlarında olan Azər adlı şəxs MTN-in baş idarəsində məsul vəzifədə imiş. Onun intihar etdiyi, yaxud kiminsə tərəfindən öldürülməsi faktı araşdırılır. Ölüm faktı ilə bağlı cinayət işi açılıb, istintaq davam edir.  (virtualaz.org)