Bakı-Sumqayıt yolunda avtomobilini hərəkətin əksi istiqamətində idarə edərək digər hərəkət iştirakçılarına təhlükə yaradan sürücünün kimliyi müəyyən edilib.
Bu barədə Baş Dövlət Yol Polisi İdarəsinin şöbə rəisi Rövşən Tağıyev məlumat verib.
O bildirib ki, sürücü avtomobili birtərəfli hərəkət yollarında müəyyən edilmiş hərəkət istiqamətinin əksinə sürməklə yol hərəkəti qaydalarını pozub:
"Bu səbəbdən sürücü Ekoloji Nəzarət Bölüyünün YPX əməkdaşları tərəfindən müəyyən edilib. "Mitsubishi Lancer” markalı 01-AD-045 dövlət nömrə nişanlı nəqliyyat vasitəsinin sürücüsü, Abşeron rayon sakini Sübhan Nəsirov barəsində Azərbaycan Respublikasının İnzibati Xətalar Məcəlləsinin (İXM) 327.4. maddəsi ilə protokol tərtib edilib. Sürücüyə 4 bal və 100 manat məbləğində cərimə tətbiq edilib”.
R.Tağıyev bir daha sürücülərə yollarda diqqətli olmağı və belə qayda pozuntuları ilə özlərinin, eləcə də digər hərəkət iştirakçılarının həyat və sağlamlığını təhlükəyə atmamağı tövsiyə edib.
(Oxu.Az)
Xəbərdən istifadə edərkən istinad etmək vacibdir.
