Artıq bir müddətdir ki, Sumqayıt şəhərində aşma təhlükəsi yaradan elektrik dirəyi ilə bağlı narazılıq yaranıb. Belə ki Sumqayıt şəhər, Yaşıldərə bağlar massivi 2A ünvanında yaşayan Əhməd Məcidov aşağı hissəsi çürüyərək sıradan çıxmış elektrik dirəyinin sakinlərin həyatına ciddi təhlükə yaratdığını, sonradan gəlib baxış keçirən işçilər tərəfindən dirəyi müvəqqəti olaraq qaz borusuna bağladıqlarını Xeberle.com-la bölüşüb.
O bildirib ki, elektrik dirəyi sıradan çıxdığı üçün aşma təhlükəsi var.
Sakinin sözlərinə görə bununla əlaqədar "Azərişıq" ASC əməkdaşları əraziyə baxış keçirib və qeyd olunan dirəyin aşmaması üçün qaz borusuna bağlayıb daha sonra gəlib yenisi ilə əvəz edəcəklərini deyərək gediblər. Lakin 2 həftədən çox zaman keçməsinə baxmayaraq heç bir əməkdaş gəlib həmin dirəyi yeniləməyib.
Məsələ ilə əlaqədar bir müddət öncə Xeberle.com olaraq "Azərişıq" ASC-yə müraciət etmişdik. Qurumdan problemin həllinin yerində araşdırılması ilə əlaqədar şikayətçi M.Əhmədin əlaqə nömrəsini əldə edərək problemi operativ həll etmək niyyətində olduqlarını bildirmişdilər. Bundan sonra "Azərişıq" əməkdaşları həmin elektrik dirəyinin yanına yenisini qoyaraq elektrik xəttini ona bərkitmiş, sanki işlərini bitmiş hesab etmişlər.
Lakin öz narazılığını yenidən bizə ünvanlayan sakin qeyd edir ki, problemin həlli xeyli vaxtdır ki, uzanır. Dirəklə yüksək gərginlikli elektrik xətti keçir. Dirək aşdığı anda bədbəxt hadisə, həmçinin qəza nəticəsində 18 ailəyə elektrik enerjisinin verilişi dayana bilər. Eyni zamanda sakinin digər bir şikayəti yüksək gərginliyi olan elektrik xətti dirəklərinin fərdi yaşayış mənzillərinin hasarlarının üzərinə aşmış vəziyyətdə qalması, qaz borusuna birləşməsi ilə bağlıdır. Qeyd olunan nasazlıqla əlaqədar həmin əraziyə böyük ölçülü avtomobillər daxil ola bilmir.
Sakinin şikayəti ilə bağlı yenidən "Azərişıq" ASC ilə əlaqə yaratmağa çalışsaq da, zənglərimizə cavab verən olmadı.
Aygün İsmayılova
Xəbərdən istifadə edərkən istinad etmək vacibdir.
