Sumqayıt şəhərini və Saray qəsəbəsini birləşdirən körpünün qəzalı vəziyyətdə olması ilə bağlı dəfələrlə media qurumlarında məlumatlar paylaşılıb. Söhbət General Məhəmməd Əsədov küçəsindən gedir. Təəssüf ki, hələki körpüdə təmir işləri aparılmır.  Minlərlə avtomobilin keçdiyi körpüdə əvvəllər də böyük dəlik, ətrafında isə çatlar əmələ gəlmişdi.
Yolda çökmələr olduğundan körpünün üzərində olan işıqforun fəaliyyəti dayandırılıb. Bu addım avtomobillərin körpünün üzəri ilə dayanmadan hərəkətini təmin etmək məqsədi ilə atılıb.
Lakin, atılan addım piyadaların da həyatı üçün təhlükə yaradır. İşıqforların işləməməsi piyadaların yolun digər tərəfinə keçməsinə imkan vermir. Son vaxtlar baş verən yol-nəqliyyat hadisələrini təhlil edəndə görürük ki, hətta piyadaların bəziləri piyada keçidində vurulur.
Piyadalara yol verməyən tək-tük sürücülərə rast gəlinir. O da çox nadir hallarda olur ki, məsələn şərait olmur və ya dayansa arxadakı avtomobil ona toxunacaq və s. Amma elə sürücülər var ki, piyada keçidlərində bilərəkdən piyadaya yol vermir. 
"Saray körpü”sündə vəziyyətin xaotik həddə çatması həm sürücülər, həm də piyadaların həyatı üçün təhlükə yaradır. Ümid edirik ki, tezliklə məsələnin köklü şəkildə həllinin şahidi olacağıq.

Elşən Yəhyayev