Sumqayıtda azyaşlı uşağı oğurlamaqda təqsirləndirilən Xırda Babayeva barəsində çıxarılmış hökmdən verilən apelyasiya şikayəti üzrə məhkəmə prosesi keçirilib.
Xırda Babayeva "ANS” telekanalında 2014-cü ilin aprel, may və iyun aylarında efirə gedən "Adam içində” verilişində Aysel Əhmədovanın maddi vəziyyətinin ağır olması, ərindən boşanması, aliment ala bilməməsi, hamilə qalması barədə məlumatları eşidib.
İstintaq materiallarında bildirilir ki, ana ola bilməyən Xırda Babayeva boşanmamaq üçün ərinə özünü hamilə kimi göstərib. Daha sonra ərinə uşaq doğduğunu deyərək 13 avqust 2014-cü il tarixdə saat 14.00-da uşaq oğurlamaq məqsədilə Bakıdan Sumqayıt şəhərinə gəlib. O, şəhərin 29-cu məhəlləsində yerləşən 11/16 saylı binanın həyətinə gələrək Aysel Əhmədovanı tapıb.
Xırda Babayeva Aysel Əhmədovaya özünü Heydər Əliyev Fondunun əməkdaşı kimi təqdim edib, onunla tanış olub, Ayselin yaşadığı mənzilə gedib.
Xırda Babayeva əlil və imkansız ailələrə yardım üçün gəldiyini bildirib, Aysel Əhmədova və onun yetkinlik yaşına çatmayan uşaqları - 2008-ci il təvəllüdlü Günay Əhmədova, 2010-cu il təvəllüdlü Tunar Əhmədli və 2014-cü il təvəllüdlü Aylin Əhmədli barəsində qeydlər aparıb, fond vasitəsilə onlara maddi kömək göstəriləcəyinə, uşaqlardan birini məktəbə, digərini isə uşaq bağçasına yerləşdirəcəyini deyib.
Bundan əlavə, Xırda Babayeva Aysel Əhmədovanı Sumqayıt şəhərindəki "Bərəkət” ərzaq malları mağazasına apararaq öz pulu ilə peçenye, çörək, Aylin Əhmədliyə yedirtmək üçün "Humana” kaşası alıb. Daha sonra Aysel Əhmədovanın yaşadığı mənzilə qayıdıb.
Bundan sonra Xırda Babayeva Aysel Əhmədovanı və uşaqlarını Sumqayıt şəhəri, "Nəsimi” adına parkın ərazisində yerləşən əyləncə mərkəzinə əyləndirmək üçün aparıb.
Əyləncə mərkəzində saat 21.40-da Xırda Babayeva Günay Əhmədovanı və Tunar Əhmədlini anaları Aysellə birlikdə "Şən aşırım” əyləncə qurğusuna mindirib. Bu zaman o, Aysel Əhmədovanın qucağında olan Aylini qurğu dayanana kimi saxlayacağı adı ilə alıb.
Həmin vaxt Xırda Babayeva körpəni və onun doğum şəhadətnaməsini oğurlayaraq götürüb, uşağı Bakıda Binəqədi rayonu, 6-cı mikrorayondakı kirayə qaldığı mənzilə aparıb.
Sumqayıt Polis İdarəsinin əməkdaşları tərəfindən 2 sentyabr 2014-ü il tarixdə keçirilmiş əməliyyat-axtarış tədbirləri nəticəsində Aylin Əhmədli həmin ünvanda tapılıb.
Xırda Babayeva Cinayət Məcəlləsinin 144.3-cü (adam oğurluğu - yetkinlik yaşına çatmayan şəxs barəsində törədildikdə və ya ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olma) və 326.2-ci (dənizçinin şəxsiyyət sənədini, vətəndaşın şəxsiyyət vəsiqəsini, pasportunu və ya digər mühüm şəxsi sənədini oğurlama) maddələri ilə ittiham edilib.
Bakı Ağır Cinayətlər Məhkəməsinin hökmü ilə o, 11 il müddətinə azadlıqdan məhrum edilib. Hökmdən narazı qalan Xırda Babayevanın vəkili apelyasiya şikayəti verib.
Vəkil Xırda Babayevaya Cinayət Məcəlləsinin 144.3-cü maddəsi ilə təqsirli bilinməsinə dair hökmün dəyişdirilməsini və həmin ittiham üzrə ona Cinayət Məcəlləsinin 70-ci (şərti məhkum etmə) maddəsinin tətbiq edilməsini istəyib.
Vəkil həmçinin qeyd edib ki, Xırda Babayevaya Cinayət Məcəlləsinin 326.2-ci maddəsi ilə verilən ittiham sübuta yetirilməyib. Buna görə o, Xırda Babayevanın barəsində bəraət hökmünün çıxarılmasını istəyib.
Sumqayıt Apelyasiya Məhkəməsində hakim İlham Həsənovun sədrlik etdiyi prosesdə apelyasiya şikayətinin dəlilləri araşdırılıb.
Hakim heyəti Bakı Ağır Cinayətlər Məhkəməsinin hökmünü ləğv edib. Xırda Babayevanın barəsində yeni hökm elan edilib.
Yeni hökmə əsasən, Xırda Babayevaya Cinayət Məcəlləsinin 326.2-ci maddəsi ilə bəraət verilib. O, Cinayət Məcəlləsinin 144.3-cü maddəsi ilə ittiham olunub və o, 10 il müddətinə azadlıqdan məhrum edilib.
Bu hökmdən narazı qalan prokuror Zəfər Ramazanov kasasiya protesti verib. Prokuror protestində Sumqayıt Apelyasiya Məhkəməsinin hökmünün ləğv edilməsini və Xırda Babayevanın cəzasının ağırlaşdırılmasını istəyib. Həmçinin Xırda Babayevanın da vəkili kasasiya şikayəti verib.
Ali Məhkəmədən Teleqraf.com-a verilən məlumata görə, tərəflərin şikayəti araşdırılması üçün hakim Fərhad Kərimovun icraatına verilib. Yaxın günlərdə tərəflərin şikayətinə baxılacaq.
Xəbərdən istifadə edərkən istinad etmək vacibdir.
