Axşam saatlarında şəhərin 9-cu mikrorayonunda fəaliyyət göstərən "Gənclik” marketdə qadın çantası oğurlanıb. Xeberle.com saytının fotoreportyoru Kamran Kazımzadənin ailəsinə məxsus qadın çantası "Gənclik” marketdə dolabdan şəxsiyyəti məlum olmayan şəxs tərəfindən götürülüb: "Alış-veriş üçün marketə daxil olduq. Çantanı marketin giriş qapısının ağzında əşyalar üçün qoyulmuş dolaba qoyduq. Dolabın açarında problem yarandığından qapısını bağlaya bilmədik. Belə olan təqdirdə orada olan mühafizəçiyə müraciət etdik. Bildirdilər ki, narahat olmağa dəyməz, rahat şəkildə alış-veriş edə bilərik. Marketdən çıxanda dolaba yaxınlaşıb çantanı götürmək istədik. Çanta isə yerində yox idi. Market rəhbərliyinə müraciət etdik. Müşahidə kameralarına baxış keçirilən zaman çantanın naməlum kişi tərəfindən oğurlandığının şahidi olduq. Çantada 100 manata yaxın pul və mənzilin açarları olub.”

K.Kazımzadə onu da bildirib ki, hadisə barədə məlumat sosial şəbəkələrdə yayıldıqdan sonra gecə saatlarında çantanı oğurlayan şəxs ona zəng edib və bağışlanılmasını rica edib: "Gecə saat 12-də oğurluq edən şəxs sosial şəbəkələrdə fotosunun yayıldığını gördüyünü deyib və məsələnin sakit şəkildə həll edilməsini xahiş edib. O, içkili olduğunu və çantanı hara tulladığını bilmədiyini dedi. Bildirdi ki şikayət etməyim, nə ziyan dəyibsə qarşılayacağını vəd etdi. Amma mən bu məsələni belə qoymayacam. Ümidvaram ki, hüquq-mühafizə orqanları tez bir zamanda oğrunu tapıb müvafiq tədbirlər görəcək”.

Gördüyünüz kimi, günümüzdə sosial şəbəkələrin həyatımızda rolu artıb və bu, həm də ictimai qınaq funksiyasını yerinə yetirir.

Maraqlıdır görəsən, marketdə təhlükəsizlik məsələlərinə cavabdeh şəxslər hara baxırmış. Belə görünür ki, dolablarında qıfıl olmayan bu ''Gənclik'' marketdə təhlükəsizliyə təminat verilmir.