Görkəmli şəxsiyyət,
dahi lider Heydər Əliyevin anım günü Sumqayıtda da böyük izdihamla qeyd olunub.
Səhər tezdən sumqayıtlıların sevimli istirahət məkanı - Heydər Parkı istiqamətində
insan axını müşayiət olunurdu.
Xeberle.com Azərtac-a istinadən xəbər verir ki,
Sumqayıt Şəhər İcra Hakimiyyətinin başçısı Zakir Fərəcov, Milli Məclisin
deputatları Muxtar Babayev, Tahir Mirkişili, Mirzəcan Xəlilov, hüquq mühafizə
orqanlarının, idarə və müəssisələrin rəhbərləri, ictimaiyyət nümayəndələri
parkın mərkəzində Heydər Əliyevin əzəmətli abidəsini ziyarət edib, önünə gül dəstələri
düzərək, xatirəsinə ehtiramlarını bildiriblər.
Anım mərasiminin iştirakçıları Heydər Əliyev Mərkəzində Ulu
Öndərin həyat və fəaliyyətindən bəhs edən eksponatlarla tanış olub və Ümummilli
Liderə həsr olunan filmi izləyiblər.
Azərbaycan tarixinin son 35 ilə yaxın bir dövründə ölkəmizin
ictimai-siyasi, iqtisadi, elmi və mədəni həyatının elə bir sahəsi yoxdur ki,
orada xalqımızın müdrik oğlu Heydər Əliyevin möhtəşəm quruculuq amallarının
yadigarları olmasın. Sumqayıtın inkişafından söz açarkən öncə şəhərin ötən əsrin
70-80-ci illərində keçdiyi inkişaf dövrü yada düşür. Çünki gənc Sumqayıtın ilk
inkişaf mərhələsi məhz həmin dövrə təsadüf edir. O illərdə ölkəyə rəhbərlik edən
ulu öndər Heydər Əliyevin başlatdığı islahatlar, inkişaf strategiyası nəticəsində
Azərbaycanın bütün şəhərləri kimi Sumqayıt da dinamik inkişaf yoluna qədəm
qoyub. Bu mənada hələ sovet illərindən sumqayıtlılar Ulu Öndərin xüsusi diqqət
və qayğısını hər zaman hiss ediblər. Heydər Əliyev ölkəyə rəhbərlik etdiyi illərdə
16 dəfə Sumqayıta səfər edib. Bu şəhər Ümummilli Liderin Azərbaycana rəhbərlik
etdiyi illərdə ölkəmizin aparıcı sənaye mərkəzlərindən birinə çevrilib. Burda
keçmiş ittifaqda metallurgiya, kimya, energetika, tikinti materialları sənayesinin
aparıcı müəssisələri yaradılıb, yeni mikrorayonlar, yaşayış məhəllələri
salınıb.
Heydər Əliyev müstəqillik illərində də Sumqayıta xüsusi diqqət
və qayğı ilə yanaşıb, çoxsaylı səfərləri zamanı sənaye müəssisələrinin
açılışlarında iştirak edib.
Bu gün inkişafının yeni mərhələsini yaşayan Sumqayıtda sənaye
parkının salınması, yeni ixracyönümlü müəssisələrin inşası, sosial layihələrin
həyata keçirilməsi Heydər Əliyevin yürütdüyü iqtisadi və siyasi xəttin uğurları
sırasındadır. Prezident İlham Əliyevin həyata keçirdiyi islahatlar nəticəsində
şəhərin sürətli inkişafı təmin olunub, Sumqayıt sənaye mərkəzi kimi vaxtilə
qazandığı şöhrətini yenidən bərpa edib.
Xəbərdən istifadə edərkən istinad etmək vacibdir.
