Sumqayıt şəhər sakini, 2013-cü il təvəllüdlü Qurbanlı Arzu Sənan qızı 2016-cı il iyunun 16-da, günorta saatlarında Sumqayıt şəhərindəki "Real” Tibb Mərkəzində boğazında damaq badamcıqlarının iltihabından əməliyyat olunub.

Həmin gün gecə saatlarında uşağın vəziyyəti pisləşib və o, dünyasını dəyişib. Meyit ekspertizaya göndəriləndən sonra uşağın boğulma nəticəsində dünyasını dəyişdiyi müəyyən edilib.

Faktla bağlı Sumqayıt şəhər Prokurorluğunda Cinayət Məcəlləsinin 124-cü (ehtiyatsızlıqdan adam öldürmə) və 320.1-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə - hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) maddələri ilə cinayət işi başlanılıb və "Real” Tibb Mərkəzinin həkim-anestezioloqu İ.Qəmbərov təqsirləndirilən şəxs qismində cəlb edilib.

Sumqayıt şəhər Məhkəməsində, hakim Ruqiyyə Əsgərovanın sədrliyi ilə keçirilən bir neçə məhkəmə prosesindən sonra hakimin qərarı ilə iş yenidən ekspertizaya göndərilib.

Ekspertiza rəyi bir neçə gün öncə məhkəməyə və zərərcəkmiş şəxslərə təqdim olunub.

Respublikanın baş anestezioloqu Aydın Qədirovun rəhbərliyi ilə Qurbanlı Arzunun ölümü ilə bağlı ekspertiza rəyi verilib.

Xeberle.com  oxu.az-a istinadən xəbər verir ki, rəydə qeyd olunur ki, xəstənin vəziyyəti və nəzərdə tutulmuş planlı əməliyyatlarla əlaqədar anestezioluqun taktikası, anesteziya üsulunun və dərmanların seçimi düzgün olub.

Dozalar uşağın yaşına və çəkisinə, əməliyyatin xarakterinə və travmatizminə uyğun olaraq təyin edilib.

Bunlarda heç bir əks göstəriş olmayıb. Əməliyyatın gedişində və sonrakı erkən dövrdə anestezioloji və reanimatoloji vəziyyət normal olub və fəsadlar müşahidə edilməyib. Xəstə "lazımi səviyyə”də ayılıb.

Həkim anestezioloq Qəmbərov İsmayıl Böyükağa oğlu peşəkarlıq nümayiş etdirib, nöqsanlara yol verməyib. Xəstənin ölümü anestezioloji taktika ilə əlaqədar olmayıb.

İ. Qəmbərovun məhkəmədə hüquqlarını qoruyan vəkil Əli Hüseynovun Xeberle.com-a verdiyi məlumata görə, bu gün bir sıra media qurumlarında yayılan məlumatlar isə həqiqəti əks etdirmir: "Əfsuslar olsun ki, bəzi yalan mətbuatda yer almaqdadır. Məhkəmə-Tibbi Ekspertiza İdarəsinin qərəzli verilmiş öncəki rəylərini göstərərək, bu rəylərin Aydın Qədirov tərəfindən verildiyini iddia edən bəzi saytlar xəbərin dəqiqliyini araşdırmadan məlumatı dərc ediblər. Belə saxta məlumatları yaymaqla maraqlı tərəflər artıq uduzduqlarını başa düşərək mətbuat orqanlarını da çaşdıraraq hər cür vasitələrə əl atırlar."

Ə. Hüseynov bütün maraqlı mətbu orqanları və informasiya saytlarını növbəti məhkəmə prosesinə də dəvət edib: "Biz bütün mətbuat orqanlarını və saytlarını 14.02.2018-ci il saat 14.00-da Sumqayıt şəhər Məhkəməsində keçiriləcək növbəti iclasa dəvət edirik. Reallığı öz gözləri ilə görüb, yayımlasınlar."

Xeberle.com