S.Vurğun adına Mərkəzi şəhər kitabxanası 1988-ci ilin fevralında erməni siyasi hiylələrinin və təxribatlarının nəticəsi olaraq Sumqayıtda törədilmiş hadisələr və XX əsrin ən böyük dəhşətlərindən olan Xocalı faciəsi ilə bağlı "Qanunun aliliyi" Hüquq-resurs Mərkəzində "Bəşəri faciə, unudulmaz tarix” adı altında "dəyirmi masa" görüşü keçirib. Şəhərin 5 №-li orta məktəbinin müəllim və şagird kollektivinin iştirak etdiyi tədbirdə ilk olaraq torpaqlarımızın azadlığı və suverenliyi uğrunda və Xocalı faciəsi zamanı həlak olanların xatirəsi bir dəqiqəlik sükutla yad edilib.

Kitabxananın abonement şöbəsinin müdiri Zemfira Mirzəyeva tədbiri açaraq, Azərbaycan tarixinə qanla yazılmış Sumqayıt hadisələrini və Xocalı faciəsini erməni faşizminin ən müdhiş nümunələri adlandıraraq, dünya ictimaiyyətinin bu hadisələrə erməni mövqeyindən, qeyri-obyektiv yanaşılmasını ədalətsizlik, tarixi haqsızlıq, siyasi riyakarlıq kimi qiymətləndirmişdir.

Azərbaycanın nüfuzlu mətbuat orqanlarından olan, bugünlərdə 90 illiyi qeyd ediləcək "Vışka" qəzetinin 1987-90-cı illərdə Dağlıq Qarabağ üzrə xüsusi müxbiri olmuş Respublikanın Əməkdar jurnalisti Rəhman Orxan həmin dövrdə həm Stepanakert, həm də Sumqayıt hadisələrinin bilavasitə şahidi kimi çıxış edərək, həmin təxribat və faciələrin ermənilər tərəfindən qabaqcadan hazırlanmış ssenari üzrə törədilməsindən, bunun üçün ermənilərin şovinist-terrorçu "Daşnaksütyun" partiyasının, eləcə də türk dünyasına düşmən kəsilmiş erməni kilsəsi Emiadzinin təlimatlarına uyğun çox gizli fəaliyyət aparıldığından, Azərbaycanın dövlət təhlükəsizliyini təmin etməli olan respublika DTK-sının isə öz üzərinə düşən ən vacib vəzifə və missiyanı yerinə yetirə bilməməsindən, Mərkəzi Komitənin birinci katibi Kamran Bağırovun Azərbacanı siyasi uğursuzluğa sürükləyən qətiyyətsizliyindən, prinsipsizliyindən, Kreml qarşısında yersiz itaətliliyindən söhbət açmışdır.

Sumqayıtın tanınmış müəssisə rəhbəri olmuş ağsaqqal ziyalı, "Tərəqqi" medallı əmək veteranı Qadir Süleymanov Sumqayıt hadisələrinin baş verməsində erməni terror qrupları tərəfindən şəhər əhalisi arasına Azərbaycan dilini təmiz bilən ermənilərin salınaraq, onlardan ibarət təxribatçı dəstələrdən istifadə edilməsinin mənfur rolundan danışmışdır.

Tədbirdə eləcə də politoloq Hacı Kamil Bədəlli, tarixçi və ilahiyyatçı Əkbər İsmayılov, Mərkəzi kitabxananın direktoru, Əməkdar Mədəniyyət işçisi Yeganə Əhmədova 1987 və 1992-ci illərdə bizim öz səhvlərimiz, laqeydliyimiz, unutqanlığımız, sayıq olmamağımız ucbatından başımıza gətirilən müsibətlərdən söhbət açmışlar.

Oxu zalının multimedia mütəxəssisi Sima Həsənova Sumqayıt hadisələri və Xocalı faciəsi ilə bağlı təşkil edilmiş sərgi barədə biblioqrafik xülasə vermiş, sumqayıtlı müəlliflər - Azərbaycanın görkəmli kino-rejissoru Davud İmanovun və Əməkdar jurnalist Eyruz Məmmədovun, Sumqayıt Dövlət Universitetinin professorları Həsən Həsənovun və Ramazan Məmmədovun qiymətli sənədli araşdırmalarından söz açmışdır.

Məktəblilərlə "dəyirmi masa" görüşündə şair-publisist, Qarabağ hadisələrinə həsr edilmiş "And" romanının müəllifi Süleyman Hüseynov və 90-cı illərdə vətən eşqi ilə könüllü olaraq cəbhəyə yollanaraq, döyüş dəstələrimizə qoşulmuş kimyaçı-mühəndis İbad İbadov da iştirak etmişlər.

Tədbirdə bir daha diqqətə çatdırılmışdır ki, XX-ci əsrin sonunda baş vermiş Sumqayıt hadisələri və Xocalı faciəsi təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır, ən dəhşətli cinayətlərdir.

 

Orxan MƏMMƏDZADƏ

 

 

 

Xəbərdən istifadə edərkən istinad etmək vacibdir.