Sumqayit şəhər polisi üzərində yarım kiloqram narkotik vasitə gəzdirən şəxsi saxlayıb. Şəhər sakini Süleymanov Emin Malik oğlunun özünü şübhəli aparması polislərin diqqətindən yayınmayıb. Saxlanılaraq polis orqanına aparılan Emin Süleymanovun üzərinə baxış keçirilib. Baxış nəticələri isə Emin üçün heç də ürək açan olmayıb.

“Baxış zamanı onun üzərindən 465 qram narkotik vasitə sayılan qurudulmuş marixuana aşkar edilib” - deyə Sumqayıt ŞPİ-nin baş müstəntiqi, İlqar Məmmədov bildirib. 

Kamera qarşısına çixmaqdan boyun qaçıran Emin, bu qədər narkotik vasitəni şəxsi istifadə üçün gəzdirdiyini deyir. İstintaq zamanı Eminin əvvəllər xuliqanlıq etdiyi üçün məhkumluq həyatı yaşadığı da məlum olub.

Hazirda Emin Süleymanov barəsində cinayət məcəlləsinin müvafiq maddəsi ilə cinayət işi başlanılıb. İstintaq isə onun bu qədər narkotik vasitəni əldə etdiyi mənbənin axtarışı ilə məşğuldur.

/anspress.com/