Sumqayıtda kütləvi dava baş verib. Təxminən 20 nəfər arasında baş verən davada iki nəfər ölümcül döyülüb.

Bu gün Sumqayıtda axşam saatlarında iki qrup arasında kütləvi dava baş verib. Bakı-Quba yolunun Sumqayıtdan keçən hissəsində yol kənarında "Kral" adı altında fəaliyyət göstərən kafedə təxminən 20 nəfər arasında mübahisə duşub. Sözləri çəp gələn şəxslər kafe sahibləri ilə müştərilər olub. Münaqişənin yaranmasına əsas səbəb kimi müştərilərin xeyli müddət kafedə oturmaları və digər qonaqlara yer vermədikləri göstərilir. Getdikcə qızışan mübahisə sonda əlbəyaxa davaya çevrilib. Nəticədə iki nəfər ölümcül döyülüb. Yaralılar əslən Astara rayon sakinləri - 24 yaşlı Tural Bayramov və 27 yaşlı İlkin Quliyevdir. Onlar dərhal Sumqayıt şəhər Təci Tibbi Yardım Xəstəxanasına çatdırılıblar. Xəstəxananın reanimasiya şöbəsindən verilən məlumata görə, döyülən gənclərdən biri İlkin Quluyevin vəziyyəti ağır olduğundan o, dərhal Bakı şəhərinə göndərilib.

Qolu və ayağı sınan, bədəninin bir neçə hissəsinə bıçaq xəsarətləri yetirilən yaralı 24 yaşlı Tural Bayramovun sözlərinə görə, kafe sahibləri onların ciblərindəki pulun coxluğunu gördükdən sonra dava salıb.

Sumqayıt şəhər Polis İdarəsindən bildirdilər ki, hadisə ilə bağlı həbs edilənlər var. Araşdırma aparılır.