Bakı şəhəri və Abşeron yarımadasında martın 30-dan 31-i gündüzədək hava şəraitinin qeyri-sabit keçməsi, güclü (təhlükəli) şimal-qərb küləyinin əsməsi ilə əlaqədar baş verə biləcək hadisələrin qarşısının alınması məqsədi ilə Sumqayıt Elektrik Şəbəkəsi tərəfindən  qabaqlayıcı və zəruri tədbirlər həyata keçirilib. Bu barədə Xeberle.com-a Sumqayıt Elektrik Şəbəkəsinin baş mühəndisi Arzuman İsmayılov məlumat verib. Onun sözlərinə görə, hazırda yaranan qeyri-stabil hava şəraiti ilə əlaqədar elektrik şəbəkəsi tərəfindən gücləndirilmiş iş rejiminə keçilib və şəhər ərazisində enerji ilə bağlı elə də böyük bir problem qeydə alınmayıb: "Yayda gördüyümüz işlərin nəticəsi olaraq, şəhərin 95 faizi mütəmadi şəkildə elektrik enerjisi ilə təmin olunur. Hazırda küləkli hava şəraitinin olmasına baxmayaraq, şəhər əhalisinin elektrik enerjisi ilə təmin olunma göstəricisi yuxarıda qeyd etdiyim kimidir. Küləkli havada əsas problemlər naqillərdə baş verən qısa qapanma, yaxınlaşma, qırılma ilə bağlı yaranır. Biz hər il yay aylarında bu kimi problemlərin yaranmaması üçün  tədbirlər həyata keçiririk. Hazırda  həyata keçirdiyimiz bu tədbirlərin nəticəsini  görürük".
A.İsmayılov bildirdi ki, bu gün ərzində yalnız 20-21-ci mikrorayonlara gedən xətlərdə və 76-cı məhəllədə elektrik enerjisi iıə bağlı problem yaranıb. Mikrorayonlara gedən xətlərdə yaranan problem Sumqayıt Elektrik Şəbəkəsinin əməkdaşları tərəfindən həll edilib. 76-cı məhəlləyə isə nəqliyyat vasitəsi ilə yaxınlaşmaq qeyri-mümkün olduğundan  problem alternativ yollarla aradan qaldırılacaq.
Elnarə Salamova
Xeberle.com

Xəbərdən istifadə edərkən istinad etmək vacibdir.