Gecə Bakının mərkəzində dəhşətli yol qəzası baş verib. APA TV-nin məlumatına görə, Bülbül prospekti ilə Zərifə Əliyeva küçəsinin kəsişməsində "VAZ-21011" və "Mercedes" markalı avtomobillər toqquşub. Qəza nəticəsində 1 nəfər ölüb, 3 nəfər xəsarət alıb.

İlkin məlumata görə, avtomobillərdən biri işıqforun qadağanedici işığında hərəkətini davam etdirib və qəza baş verib.

Toqquşma çox güclü olub və hər iki avtomobil deformasiyaya uğrayıb. Hadisə yerinə Fövqəladə Hallar Nazirliyinin Xüsusi Riskli Xilasetmə Xidmətinin xilasediciləri cəlb ediliblər.

Qəza nəticəsində həlak olan VAZ-21011-in sürücüsüdür. Onun şəxsiyyətini dəqiqləşdirmək hələlik mümkün olmayıb. Xəsarət alanlar isə "Mercedes" markalı avtomobildə olublar. Bunlar Şıxəli Şıxəliev, Turqut Əsədov və Tural Ələkbərovdur. Xəsarət alanların hər üçü həmyaşıddır - 23 yaşları var. Dostlar şəhərdəki klublardan birində Çempionlar Liqası çərçivəsində "Qalatasaray" və "Çelsi" klublarının qarşılaşmasını izlədikdən sonra evə qayıdırlarmış. Maşını xəsarət alanlardan biri - Əsədov Turqut Əsildar oğlu idarə edib. O, Bülbül prospekti ilə işıqforun yaşıl işığında hərəkət edərkən Zərifə Əliyeva küçəsi ilə kəsişmədə işıqforun qırmızı işığında dayanmayan VAZ-21011 Turqut Əsədovun avtomobilinə çırpılıb. Zərbənin gücündən maşınlar səkiyə düşüblər.

Faktla bağlı araşdırma aparılır.