35 yaşlı Rövşən Əliyev təxminən 10 ilə yaxındır ki, narkotik vasitələr aludəçisidir. Bu vərdişinə görə dəfələrlə məhkum olunan Rövşən bir neçə ay əvvəl azadlığa buraxılıb. Amma azadlığa çıxandan sonra Rövşən iş-güc sahibi olmaq əvəzinə cibgirliklə məşğul olmaq qərarına gəlib. O hər gün tanışı Ramin Kərimovla birgə yaşadığı Sumqayıt şəhərindən paytaxta gələrək sərnişin avtobuslarında oğurluq edirmiş. Sonuncu belə cibgirliyi edən zaman isə hər iki şəxs Binəqədi rayon polis idarəsinin əməkdaşları tərəfindən elə iş başında həbs ediliblər.

Hər iki şəxs istintaqa ifadə verən zaman etdikləri cinayəti etiraf ediblər. Araşdırma zamanı onların başqa cibgirlik faktlarının da üstü açılıb.

Hazırda Ramin Kərimov və Rövşən Əliyev barəsində Binəqədi rayon polis idarəsində cinayət məcəlləsinin oğurluq maddəsi ilə cinayət işi başlanılıb. Həyatlarını azadlıqda qura bilməyən Ramin və Rövşənin əməlləri sübuta yetirilsə, onları yenidən uzunmüddətli həbsxana həyatı gözləyəcək.

/anspress.com/