Həkimlər reanimasiyada olan uşağın valideynlərindən təcili pul tələb edirlər

Sumqayıt şəhər Uşaq Xəstəxanasında saxlanılan körpəyə sistem köçürülməsi üçün həkimlərin uşağın valideynlərdən rüşvət istəyir. Bu barədə XeberLent.az informasiya agentliyinə uşağın valideyni Murad Orucov məlumat verib. Onun sözlərinə görə, sahə həkiminin təqdimatı ilə xəstə uşağını Sumqayıt şəhər Uşaq Xəstəxanasına gətirib. Əvvəlcə körpə reanimasiya şöbəsinə qəbul edilsə də, üç gün sonra palataya keçirilib. Ancaq palataya yerləşdirildikdən sonra, ondan sistemin köçürülməsi və dərmanların alınması üçün pul tələb ediblər.

Tələb olunan pulu verə bilməyən M.Orucov Səhiyyə Nazirliyinin “qaynar xətti”nə müraciət edib. Lakin valideyn bildirib ki, “qaynar xəttə” müraciəti nəticəsiz qalıb. Yalnız M.Orucov həkimlərə bu barədə mediaya şikayət edəcəyini dedikdən sonra ona bildiriblər ki, uşaq sətəlcəmdir və dava-dərmanı valideyn alıb gətirməlidir. Valideyn şikayətdə onu da bildirib ki, onun bu dava-dərmanı almağa imkanı yoxdur.

Qeyd edək ki, saytın yazdığına görə, hazırda körpəyə müalicə edilmir və palatada qalır.