Oğlunu öldürməyə cəhd etməkdə ittiham olunan Sumqayıt şəhər sakini, 1936-cı il təvəllüdlü Əliyev Əbülfəz Hüseynbala oğlunun məhkəmə istintaqı yekunlaşıb.

 Virtualaz.org saytının müxbirinin verdiyi məlumata görə, hadisə ötən il iyunun 6-da baş verib. Oğlunun nikahdankənar doğulduğunu iddia edən Ə.Əliyev həyat yoldaşı Fəridə Əliyevadan boşanıb. Amma rəsmi şəkildə boşanmalarına baxmayaraq həm onunla, həm də oğlunun ailəsi ilə eyni mənzildə yaşayıb.

 Mütəmadi olaraq ailədə yaranan mübahisə, dava-dalaşla bağlı arvadına, oğluna və gəlininə tapançadan atəş açaraq xəsarətlər  yetirən Ə.Əliyev 2005-ci ildə məhkum olunub. Cəzasını çəkib qayıdandan sonra növbəti dəfə oğlu Arazın ona evdə səs-küy salmasını irad tutduğuna görə onu öldürmək istəyib.

 Təqsirləndirilən şəxs qismində məhkəmədə ifadə verən Əbülfəz Əliyev ona elan olunmuş ittihamla özünü təqsirli bilib: “Tezdən dənizkənarı parka getmişdim. Özümü narahat hiss etdiyim üçün evə tez qayıtdım. Dəhliz qapısını örtülü, Arazgilin də otağında kimsənin olmadığını zənn edib çaydanı qaz peçinin üstünə qoymaq istədim. Bu zaman Arazın “heyvan köpəyoğlu, sakit ol də, yatıram” deməsini eşitdim. Əslində çaydanı qızdırmağa qoyarkən hər hansı narahatçılıq yaratmamış, səs salmamışdım.  Uzun illər oğlumun mənə qarşı etdiyi kobud, dözülməz hərəkətləri gözlərim önündə canlandı. Ona qarşı qəzəb və nifrətim daha da artdı. Araz otaqda tək idi, divanda uzanmışdı. Az sonra ona yaxınlaşıb yatdığını dəqiqləşdirdim. Fikirləşdim ki, ahıl adamam, əgər Araz oyaq olsa, onu öldürməyə gücüm çatmayacaq. Odur ki, mətbəxə keçib xəncərəbənzər bıçağı götürüb yenidən Araz yatan otağa qayıtdım. Bıçaqla baş nahiyəsinə altı dəfə zərbə endirdim. Araz zərbələrdən oyanıb əlimdən çıxmağa çalışsa da imkan vermədim. Təpiklə məni özündən kənara itələdi, divandan düşüb qaçdı. Ayaqları qan içində, döşəmə isə linolium olduğundan sürüşüb yerə dəydi. Arazı arxadan tutub döşəməyə sıxaraq qalxmasına imkan vermədim və kürəyinə iki bıçaq vurdum. Bıçağı əlimdən almağa çalışsa da bacarmadı, amma təpik ataraq məni özündən kənarlaşdırdı və həyətə qaçdı. Səs-küyə toplaşan qonşular Arazı xəstəxanaya apardılar”. 

 Zərərçəkmiş şəxs qismində dindirilən Araz Əliyev ifadəsində göstərib ki, atası anasından boşanıb, onlarla yaşadığı müddət ərzində daim bağlı saxladığı otağından pulunun və ev əşyalarının oğurlandığını bəhanə edərək evdə dava-dalaş salıb: “Hələ 10 il öncə atam şalvarının cibindən 880 dollar pulun yoxa çıxdığını, həmin pulların anam Fəridə və evin gəlini Yeganə tərəfindən oğurlandığını deyir, onlardan pulu tələb edirdi. Pnevmatik qaz balonlu tapança ilə əvvəl anama, sonra Yeganəyə, daha sonra isə mənə atəş açmışdı. Buna görə atamı həbs etdilər. Həbsdən qayıdandan sonra atamın yenə də bizimlə bir mənzildə yaşayacağını nəzərə alıb onun qayıtmasına bir neçə gün qalmış kirayə ev tapıb köçdük. Atam həbsdən qayıdıb həmin mənzildə tək yaşadı. Kirayə pulunu verə bilmirdik, atamsa bizi evə buraxmırdı.

 Ona görə anam atama qarşı mənzilə köçürmə və mənzildən istifadə qaydalarının müəyyən olunması tələbinə dair Sumqayıt Şəhər Məhkəməsində iddia qaldırdı. İddia qismən təmin olundu və biz mənzilin iki otağına köçdük. Mənzil birinci mərtəbədə yerləşdiyindən qardaşım Azər otağın birinin qapısını həyətə açaraq onu iki otağa uyğunlaşdırmışdı və ailəsi ilə orada yaşayırdı.

 Mənzilə köçürüldükdən sonra atam yenə də əvvəlki hərəkətlərini davam etdirir, mütəmadi olaraq evdə dava-dalaş salır, bizi hədələyirdi. Ata-oğul kimi söhbət edib bizə olan nifrətinin səbəbini soruşdum. Atam anamın ona xəyanət etdiyini, mənim başqa kişidən doğulduğumu, fürsət düşərsə, anamı da, məni də öldürəcəyini dedi. Dava salmaqdan ötrü qəsdən söz-söhbət, dava-dalaş salır, dəhlizdə alt paltarında gəzir, yanından keçərkən ünvanımıza nalayiq söyüşlər işlədirdi. Bu hərəkətlərinə görə heç kim onunla mənzildə tək qalmırdı. Giriş qapısının açarı onda idi, istədiyi vaxt girib-çıxırdı. Bir qayda olaraq tezdən evdən çıxır, günorta gəlib yemək yeyir, sonra yenidən gedir, bir də axşam qayıdırdı.

Hadisə baş verən gün işdən evə yorğun qayıtmışdım, yatıb dincəlmək istəyirdim. Atam da evdə yox idi. Onun hələ gec gələcəyini düşünüb divanda uzandım, qapını bağlamadım. Yatıb yuxuya qalmışam. Nə qədər müddət keçdiyini, atamın evə nə vaxt gəldiyini bilməmişəm.

 Qəflətən başımda ağrı hiss etdim. Ayılarkən atamı əlində bıçaq başımın üstündə qəzəbli şəkildə dayandığını gördüm. Əlindən çıxmaq istədikdə “səni onsuz da öldürəcəyəm” dedi və vurmağa başladı. Məni öldürəcəyini dərk edib birtəhər ayağa qalxıb qaçmaq istədim. Ayağım sürüşdü, yerə yıxıldım. Atam üstümə hücum çəkib bu dəfə kürəyimdən vurdu. Onu təpiklə vurub özümdən birtəhər kənarlaşdırdım və həyətə qaçdım. Qonşuların köməyi ilə xəstəxanaya aparıldım”. 

 Şahid qismində dindirilən Fatma Əliyeva məhkəməyə verdiyi ifadəsində həyat yoldaşının spirtli içkiyə və narkotik vasitələrə meylli adam olmadığını, amma qazancını daim gizlədib ailəsini maddi sıxıntı içində saxladığını, mütəmadi olaraq evdə söz-söhbət yaratdığını, bu səbəbdən də ondan rəsmi qaydada ayrıldığını göstərib.

 Məhkəmənin hökmü ilə Əbülfəz Əliyev cəzasını ciddi rejimli cəzaçəkmə müəssisəsində çəkməklə 11 il 3 ay müddətinə azadlıqdan məhrum edilib.