Gəncədə əhalinin hiddətinə səbəb olan yeni qadağa
AzadXeber.net-ə daxil olan məlumata görə, Gəncənin icra hakimi Elmar Vəliyev restoranlarda dindar şəxslər üçün ayrıca içki olmayan masanın açılmasına qadağa qoyub. O, restoran sahiblərinə xəbərdarlıq edib ki, bu qadağaya uymayacaqları təqdirdə cərimələnəcəklər.
Redaksiyamıza məlumatı verən şəxs bildirib ki, Gəncədə restoranların birinə toya gedib və ayrıca içkisiz stol açılmasını istəyib. Restoran müdriyyəti isə xəbərdarlıq aldığını və hətta bir dəfə buna görə 14 min manat cərimələndiyini deyib.
Xatırladaq ki, bu Elmar Vəliyevin ilk belə addımı deyil. Gəncəyə rəhbər təyin edildiyi gündən etibarən Gəncə dindarlarına təzyiq edən Vəliyevin hətta şəhərin rəsmi ruhaniləri ilə də problemi yaşanmışdı. Qafqaz Müsəlmanları İdarəsinin Qərb zonası üzrə səlahiyyətli nümayəndəsi də Elmar Vəliyevin təzyiqinə məruz qalmışdı.
Qeyri-rəsmi məlumatlara görə, E.Vəliyevin tapşırığı ilə namaz vaxtları (məxsusən Cümə günləri) məscidlərin qarşısına polislər və müəllimlər qoyulur. Onlar orta məktəb şagirdlərini məscidə buraxmır, müəllimlər məscidə gələn şagirdləri, dövlət idarə və müəssisə işçilərini və eləcədə müəllimləri qeydiyyata alırlar. Şagirdlərin valideyinlərinə övladlarının məscidə qoymamaqlarını, müəllim və idarə işçilərinə məscidə getməməklərini tapşırırlar.
Bir neçə il öncə, İcra Hakimiyyətində keçirilən müşavirəyə dəvət olunan din xadimlərinə qəti göstəriş verilib ki, Ramazan ayı boyunca məscidlərdə iftar süfrələrinin verilməsi ləğv edilməli, Qədr (Əhya) gecələrinin keçirilməsi yasaqlanmalıdır. Həmçinin, Gəncədə siravi dindarlarla yanaşı Qazaxlar, Şah Abbas, Qırıxlar məscidlərinin rəsmi ruhanilərinin inzibati orqanlara çağırılıb, təzyiqlərə məruz qalmaları əhali arasında çaşqınlıq yaratmışdı.
Xəbərdən istifadə edərkən istinad etmək vacibdir.
