Yazıçı, “Azərbaycan” jurnalının əməkdaşı Sara Nəzirova bu gün səhər saatlarında dünyasını dəyişib.

“Azərbaycan” jurnalının baş redaktoru İntiqam Qasımzadənin  verdiyi məlumata görə, onun ölümünə səbəb uzun müddət əziyyət çəkdiyi xərçəng xəstəliyi olub.

İ. Qasımzadə qeyd edib ki, yazıçı son aylarda özünü yaxşı hiss etsə də, səhhəti son günlərdə kəskin pisləşib. S. Nəzirova öz vəsiyyəti il Sahil qəsəbəsindəki qəbiristanlıqda dəfn olunub.

Qeyd edək ki, Sara Nəzirova 1944-cü ilin 29 dekabrında Oğuz rayonunda anadan olub. 1965-ci ildə Azərbaycan Dövlət Pedaqoji İnstitutunu bitirib. 1975-ci ildə Azərbaycan Elmlər Akademiyasının Fəlsəfə və Hüquq İnstitutunda estetika üzrə aspiranturanı bitirib. 2002-ci ildə Fransanın Lill şəhərində Avropa Beynəlxalq Jurnalist Məktəbinin diplomunu alıb.

1984-cü ildə SSRİ Rəssamlar İttifaqına, 1988-ci ildə isə SSRİ Yazıçılar İttifaqına üzv qəbul olunub. 1966-cı ildən 1988-ci ilədək Azərbaycan Dövlət İncəsənət Muzeyində işləyib. Bu illər ərzində muzeydə müşayiətçi, kiçik elmi işçi, filial müdiri, şöbə müdiri və baş elmi işçi vəzifələrində çalışıb.

1988-ci ildən Azərbaycan Yazıçılar Birliyində və «Azərbaycan» jurnalının nəsr şöbəsində işləyib.

1983-cü ildə  «Terrakota», 1986-cı ildə «Qədir ağacı», 1992-ci ildə  «Tale damğası», 1990-cı ildə  «Nağıl nabatı», 1996-cı ildə  «Beton evdən yazılar», 2007-ci ildə «Əşrəf Muradoğlu» və başqa kitabları çap olunub.

«Azərbaycanfilm» kinostudiyasında «Batmış şəhərin incəsənəti», «Nar nağılı», «Qəsd», «İçərişəhərin hamamları», «Dost dosta tən gərək», «Üfüqü ötənlər» filmləri onun ssenariləri əsasında çəkilib.

Sara Nəzirovanın «Nağılını göstər», «Mərd körpüsü», «Qayıt», «Sözün sehri» pyesləri Azərbaycan Dövlət Teatrlarında tamaşaya qoyulub.

Əsərləri rus, ukrayna, ingilis, ispan, çin və s. dillərdə nəşr olunub.

9 may 2012-ci ildə “Əməkdar incəsənət xadimi” fəxri adına layiq görülüb.(apa.az)