Bu gün Xocalı faciəsinin 24-cı ildönümüdür.
Ölkəmizin hər yerində olduğu kimi, Xocalı faciəsinin qurbanları Sumqayıtda da böyük ehtiramla yad edilib. Mərasimə qatılan Sumqayıt Şəhər İcra Hakimiyyətinin başçısı Zakir Fərəcov Şəhidlər xiyabanında Xocalı faciəsi qurbanlarının xatirəsinə ucaldılan abidəni ziyarət edib. İcra başçısı müqəddəs amal uğurnda canını qurban verən igidlərimizin xatirəsinə  ucaldılmış abidənin üzərinə tər qərənfil dəstələri düzüb, ehtiramını ifadə edib. 
Daha sonra şəhər ictimaiyyətinin nümayəndələri, bütün idarə, təşkilat və müəssisələrinin kollektivləri abidəni ziyarət edərək tər çiçəklər qoyublar.
Xatırladaq ki, 1992-ci il fevralın 25-dən 26-na keçən gecə Ermənistan silahlı qüvvələri, Azərbaycanın Dağlıq Qarabağ ərazisindəki erməni silahlı dəstələri, keçmiş SSRİ-nin Xankəndidə yerləşən 366-cı motoatıcı alayının şəxsi heyətinin və texnikasının bilavasitə iştirakı ilə Xankəndi ilə Əsgəran arasında yerləşən Xocalı şəhərini zəbt edərək xalqımıza qarşı soyqırımı siyasətini həyata keçiriblər. Xocalının işğalı zamanı bir gecədə dinc əhalidən 613 nəfər, o cümlədən 63 uşaq, 106 qadın, 70 qoca xüsusi amansızlıqla, işgəncələrlə öldürülüb, insanların başları kəsilib, gözləri çıxarılıb, hamilə qadınların qarınları süngü ilə deşik-deşik edilib.
Xeberle.com