Cinayət işini araşdıran müstəntiq barəsində isə xüsusi qərarda çıxarıldı.
Bakı Ağır Cinayətlər Məhkəməsində Qardaşına şişlə xəsarət yetirməkdə ittiham edilən Əhmədov Tahir Qazəhməd oğlunun cinayət işi üzrə məhkəmə prosesi keçirilib.
Xeberle.com Bizimyol.info-ya istinadla xəbər verir ki, cinayət işi hakim Azad Məcidovun sədrlik ediyi kollegiyanın icraaındadır.
Prosesdə dövlət ittihamçısı çıxı edərək, Tahir Əhmədovun 4 il müddətinə azadlıqdan məhrum edilməsini istəyib. Prokuror həmçinin işi araşdıran Şabran Rayon Polis Şöbəsinin baş müstəntiqi, polis mayoru Elşən Əliyev barəsində yol verdiyi ciddi nöqsanlara görə xüsusi qərardad çıxarılaraq Daxili İşlər Nazirliyinə göndərilməsini istəyib.
T.Əhmədovun vəkili isə çıxışında müdafiə etdiyi şəxsin günahsız olduğunu deyib. O bildirib ki, Tahir Əhmədov qardaşını vurmayıb və bu səbəbdən də barəsində bəraət hökmü çıxarılmalıdır.
Tahir Əhmədov da son sözündə qardaşını vurmadığını deyib. O bildirib ki, hadisə günü sərxoş olublar, kabab bişirən zaman qardaşı yıxılıb və şiş onun qarnına batıb.
Məhkəmədə ifadə verən Cabir Əhmədov da yıxıldığını və şişin qarnına batdığını söyləyib. O, qardaşından şikayətçi olmadığını bildirib.
Məhkəmə müşavirədən sonra hökmü elan edib. Hökmə əsasən Tahir Əhmədov 3 il müddətinə azadlıqdan məhrum edilib. Məhkəmə həmçinin işi araşdıran Şabran Rayon Polis Şöbəsinin baş müstəntiqi, polis mayoru Elşən Əliyev barəsində yol verdiyi ciddi nöqsanlara görə xüsusi qərardad çıxarılması və Daxili İşlər Nazirliyinə göndərilməsi barədə qərar çıxarıb.
Hadisə 2015-ci ildə Şabranda baş verib. Tahir Əhmədovun aralarında yaranmış mübahisə zəminində qardaşı Cabir Əhmədovu bıçaqla vurduğu bildirilir. Onun barəsində cinayət işi açılıb. İş məhkəməyə göndərilsə də ev dustaqlığında olan Tahir Əhmədov məhkəməyə gəlməyib. Bundan sonra onun barəsində axtarış elan edilib və həbs olunub.
Xəbərdən istifadə edərkən istinad etmək vacibdir.
