Ailənin son durumunu öyrənmək üçün E. Salahovun yerləşdirildiyi palataya baş çəkdik. Qarnından və ayaqlarından yanıq xəsarətləri alan E.Salahovun vəziyyəti normal idi. Durumu ilə bağlı məlumat verən E. Salahov hərəkət etməkdə, danışmaqda çətinlik çəkdiyini və mütəmadi sistem altında olduğunu bildirdi: “Həyat yoldaşımın vəziyyəti daha ağırdır. Bədəninin 45 faizi yanıb. Hazırda reanimasiya şöbəsinə yerləşdiriblər. Nə zaman palataya köçürüləcəyi haqqında heç nə deməyiblər ”.

E.Salahov bildirdi ki, özlərini yandırmalarının səbəbi yaşadıqları evdən çıxarılmaları və onlara ödənilməli olan məbləği ala bilməmələridir: “8 il əvvəl bir qohumumdan ev almışam. Sumqayıtda Hacı Zeynalabdin Tağıyev qəsəbəsində idi.  Bütün sənədləri də qaydasında olub. Əvvəlcədən əlbir olub məni aldadıblar. Evimin sənədləri məhkəmə tərəfindən etibarsız sayıldı, çox ədalətsiz qərar çıxardılar, mənim evimdən çıxarılmağımla bağlı. Gör bizi hansı həddə çatdırdılar ki, şəhərin mərkəzində Prezident

Administrasiyasının qarşısında mən addımı atdım, özü də ailəmlə birgə. Körpə uşaqla çöldə qalmaqdansa ölməyi üstün tutduq”. 

Qarabağ qazisi onu da qeyd etdi ki, müxtəlif qurumlardan nümayəndələr gələrək onun durumu ilə maraqlanıblar: “Bizim müalicəmizi dövlət öz üzərinə götürüb və söz veriblər ki, hər şey yaxşı olacaq”. 

İki gün ərzində dövlət qurumlarından Sumqayıt Şəhər Prokurorluğu, İcra Hakimiyyətinin və Prezident Administrasiyasının nümayəndələri Qarabağ qazisinə baş çəkib, ona maddi, tibbi, hüquqi yardım göstərəcəklərinə dair söz veriblər. 

E.Salahov onu da qeyd etdi ki, hadisə ilə əlaqədar cinayət işi açılıb, onu və həyat yoldaşını tibbi ekspertizadan keçiriblər, iş üzrə istintaq gedir. 

Qeyd edək ki, 1975 - ci il təvəllüdlü E. Salahov 1993 -cü ildə  18 yaşında ikən cəbhəyə gedib və 4 il Tərtərdə döyüş xəttində döyüşüb. Döyüşlərdə bir neçə dəfə yaralanıb, lakin bütün sənədlərini cəbhədə itirdiyindən bugünədək heç bir yardım və müavinət ala bilməyib. 

8 il müddətində ailəsini qəbir daşı yonmaqla dolandıran E. Salahovun 5 yaşlı bir qız övladı var. Xanımı Jalə Salahova isə evdar qadındır. Hadisədən bir gün öncə, körpəni xalasının evinə aparıblar və hazırda orada qalan balaca valideynlərinin başına gələnlərdən xəbərsizdir.  

Elçin Salahov ölkəmizdə Qarabağ veteranlarına olan biganəlikdən narazıdır: “4 il vətən uğrunda vuruşmuşam, yara almışam, sağlamlığımı itirmişəm, indi bir problemi həll eləmək üçün özümü yandırmaq həddinə çatmışam. Əslində, dövlət özü mənim vəziyyətimlə maraqlanmalı idi. Bu neçə ildə bircə dəfə də bunu görmədik ”. 

Son iki gündə yaxın qohumlarından başqa cəbhə yoldaşları, qazilər, dövlət qurumlarının nümayəndələri ilə yanaşı jurnalistlər E.Salahovu tək qoymayıblar.

Musavat.com-a danışan Etimad Əsədov baş verən hadisəni pisləyərək, Qarabağ qazilərinə olan laqeyd münasibəti tənqid etdi: “Gərək bütün Qarabağ qaziləri özlərini yandırsınlar ki, onların probleminə kimsə baxsın? Cənab prezident hər çıxışında deyir ki, Qarabağ qazilərinə, əlillərinə, şəhid ailələrinə qayğı göstərilməlidir, hər kəs onlara hörmətlə yanaşmalıdır. Bütün bunları bilə-bilə məhkəmələrdə, dövlət qurumlarında Qarabağ veteranlarına çox aşağılayıcı, ögey münasibət var. Bunun da nəticəsi odur ki, Qarabağ qazisi ailəsi ilə birgə özünü yandırıb. Bu neçənci belə hadisədir. Yəqin ki, dövlət bir tədbir görəcək”.