Bir müddət bundan öncə, Sumqayıt şəhərində baş vermiş şübhəli intihar hadisəsi barədə sizlərə xəbər vermişdik. 

Qeyd edək ki, uzun illər Sumqayıt şəhəri "Karvan" Ticarət Mərkəzində çalışmış iş adamı 1978-ci il təvəllüdlü Quliyev Əliağa Avqustun 16-sı deyilənə görə, öz bağında ağacdan  asılı vəziyyətdə tapılmışdı.  Mərhum Quliyev Əliağa uzun müddət "Karvan" T/M-də nüfuzlu iş adamlarından sayılırdı. Lakin keçən ilin oktyabr ayında adıçəkilən ticarət mərkəzində baş vermiş yanğından sonra, bir çox sahibkarlar kimi, o da müflis oldu. Elə bütün işlər bundan sonra baş verdi. Mərhumun yaxınlarının bildirdiyinə görə, Əliağanın külli miqdarda borcu əmələ gəldi, amma o, heç zaman bu borclara görə özünü asmazdı. Ölümündən sonra, mərhumun haqqında uzun-uzadı sözlər, şayiələr gəzməyə başladı. Bir qrup insanlar  borcunun çox olduğuna görə özünü öldürdüyünü iddia etdilər, bəziləri isə onun öldürüldüyünü dedilər. Amma mərhumun ailə üzvləri israrla bildirirlər ki, o, bu əqidənin sahibi deyildi. Əliağa heç zaman borca görə özünü öldürməzdi. Hətta onun yaxın dostları, qohumları onun bu qədər borcu olduğunu bildikdə ona kömək edəcəklərini də qeyd etmişdilər.   

Bu gün mərhum Əliağa Quliyevin meyiti analiz üçün ekskumasiya edildi. Onu da qeyd edək ki, istintaqın aparılmamasından narazı olan mərhumun ailə üzvləri ölkə başçısı İlham Əliyevə, Heydər Əliyev Fondunun prezidenti Mehriban Əliyevaya, Daxili İşlər Naziri Ramil Usubova, Baş Prokuror Zakir Qaralova və Məhkəmə Tibbi Ekspertiza Mərkəzinin rəhbəri Şakir Musayevə şikayət ərizəsi göndəriblər. (xeberlent.az)