Ötən gecə saat 00:30-dan başlayaraq Zaqatala və Balakən rayonlarında güclü qasırğa qopub. ANS PRESS-in bölgə müxbirinin verdiyi məlumata görə, təbii hadisə nəticəsində hər iki rayonda ciddi fəsadlar yaranıb.

Belə ki, ilk öncə yağışla müşahidə olunan külək əsib. Zaqatalada yağışın miqdarı az olsa da, sonradan külək güclənib və frtınaya çevrilib. Fırtına nəticəsində rayonda bir çox evlərin, obyektlərin, dövlət binalarının dam örtüyü dağılıb. Rayon ərazisində və şəhərin mərkəzində iri gövdəli ağaclar kökündən qopub.

Bir çox işıq dirəkləri aşıb. Nəticədə gecədən başlayaraq rayonda elektrik enerjisinin verilişi dayanıb. Güclü fırtına yerli televiziyanın yayım ötürücüsünü evlərin üstünə aşırıb.

Təbii hadisə Balakəndə də böyük problemlər yaradıb. Rayona yağan yağış nəticəsində evlərin həyətlərinə su dolub. Rayonun elektrik enerjisi tamamilə kəsilib. Evlərin bə obyektlərə ciddi ziyan dəyib.

Hazırda dəymiş ziyanın aradan qaldırılması istiqamətində işlərə başlanıb.

Qeyd edək ki, hazırda hər iki rayonda elektrik enerjisinin verilişi dayandırılıb.