Sumqayıt şəhər Səhiyyə Şöbəsinin baş pediatrı, əməkdar həkim Xalidə Quliyeva dünən Sumqayıtdakı 1 saylı Doğum Evində baş verən uşaq ölümü ilə bağlı Xeberle.com-a açıqlama verib. Açıqlamanı olduğu kimi diqqətinizə çatdırırıq:

Körpənin dünyasını dəyişmə səbəbi heç də uşağın qohumlarının dediyi kimi həkimlərin günahı üzündən baş verməyib. İlk öncə diqqətinizə çatdırım ki, uşağın anası hamiləlik dövrünü qanazlığı fonunda keçirib. Belə olduqda körpədə Hipoksik travma, yəni beyinə qansızma və uşaqda oksigen çatışmamazlığı ehtimalını artırmış olur. Eyni zamanda Hipoksiya vəziyyəti dölün mərkəzi sinir sisteminin zədələnməsi və qansızma əlamətləriylə müşahidə oluna bilər. Bu hal doğuşdan bir müddət sonra özünü uşaqda göyərmə və qıcolma hallarında göstərə bilir. Sözügedən uşaqda bu hal 2 gün sonra baş verib və dərhal da körpə doğum evindən uşaq xəstəxanasına köçrülüb. Aparılan reanimasiyon tədbirlərə baxmayaraq təqribən 9 saatdan sonra uşaq mərkəzi sinir sisteminin Hipoksiya mənşəli zədələri nəticəsində dünyasını dəyişib. Uşağın klinik vəziyyətinə, aparılan müayinələr və yaxın qan qohumluğu nikahından doğulmasına görə, genetik pozuntuların olmasına görə, anadangəlmə ürək qüsurunun da olması istisna olunmur. Dəqiq diaqnoz isə körpənin meyidinin təşhirinin aparılması nəticəsində tam mümkün olardı. Lakin körpənin valideynləri meyidin təşhirinə etirazlarını bildirirdilər. Sonda onu da qeyd edim ki, uşağın anası hamiləlik dövründə Bakıda qadın məsləhətxanalarının birində qeydiyyatda olduğu üçün orada aparılan müayinələrdə dölün vəziyyəti daha dəqiq aydınlaşdırıla bilərdi.