Bakı şəhərində koronavirusa yoluxma 45 faizdən yuxarıdır.
Bunu İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev Nazirlər Kabineti yanında Operativ Qərargahın keçirdiyi mətbuat konfransında deyib. Onun sözlərinə görə, Gəncə-Qazax bölgəsində yoluxma 14 faiz, Lənkəranda isə 10 faizdir.
"Gəncə zonasında yoluxma sürətlə artmışdı. Operativ şəkildə işçi qrupumuz ezam olundu və məsələ araşdırıldı. Karantin rejiminə bir o qədər riayət olunmadığı üçün həmin bölgədə yoluxma sayı artıb. Bütün yoluxmalar araşdırıldıqda məlum olur ki, xəstələnmə halları ailə üzvləri arasında olur. Bir vətəndaş ailə üzvlərini xəstəliyə yoluxdur. Digər tərəfdən tibb işçiləri arasında yoluxma müşahidə edilir. Gəncədə də belə hal müşahidə olunmuşdu”.
Z.Əliyev bildirib ki, şimal və cənub zonalarında yoluxmalar sərhədlərdən keçən həmvətənlərimizin xəstəliyi özləri ilə gətirməsi nəticəsində mümkün olub
"Rusiyada keçən həmvətənlərimizin çoxunda pozitiv nəticə aşkarlanmışdı. Eyni zamanda, cənub bölgəsində pozitivlər aşkarlanırdı. Lənkəran və Cəlilabad zonasında bu kimi yoluxmalar baş vermişdi. Zaman-zaman ocaqlar ortaya çıxır. Salyanda da dünən bu meydana çıxmışdı”.
Z.Əliyev qeyd edib ki, Bakıda ən çox yoluxma Yasamal və Sabunçu rayonlarındadır.
"Yasamalda bir neçə ocaq müəyyənləşmişdi, bir nəfər çoxlu sayda insanı yoluxdurmuşdu”.(azvision.az)
Xəbərdən istifadə edərkən istinad etmək vacibdir.
