Ötən gecə paytaxtın Nəsimi rayonunda hərəkətdə olan yük avtomobilində yanğın olub.

Hadisə Ziya Bünyadov prospektində qeydə alınıb. 1967-ci il təvəllüdlü Ruslan Mustafayev özünə məxsus "Ford" markalı yük avtomobili ilə Dərnəgül şossesinə doğru hərəkətdə olarkən anidən avtomobildə yanğın olub.
 
Sürücü avtomobildən düşüb dərhal Fövqəladə Hallar Nazirliyinin "112" qaynar xəttinə məlumat verib. Əraziyə dövlət yanğından mühafizə xidmətinin Nəsimi, Nərimanov və Binəqədi rayon yanğınsöndürən avtomobilləri və canlı qüvvəsi gəlib. Alov ram edilsə də avtomobil və onun yük yerində olan kondisioner və xalçalar yanaraq yararsız hala düşüb. Hadisə zamanı xəsarət alan olmayıb.
 
Sürücü Ruslan Mustafayevin sözlərinə görə, hadisə zamanı avtomobildə tək olub. İlkin ehtimala görə, yanğına avtomobilin elektrik naqillərində baş verən nasazlıq səbəb olub. Yanğın yeni inşa edilən tunelin çıxışında olduğundan yolun hər iki istiqamətində təxminən 40 dəqiqəyə qədər tıxac yaranıb. Yanan avtomobil Dövlət Yol Polis əməkdaşları tərəfindən cərimə meydançasına aparıldıqdan sonra yolda avtomobillərin hərəkəti bərpa edilib. 

Bu gün Bakıda daha bir avtomobil yanıb.Nəsimi rayonu ərazisində - Ziya Bünyadov praspektinə birləşən tunelin girişində yük maşını qəfildən alışıb.

Hadisə şahidlərinin sözlərinə görə, hansısa firmaya məxsus olan həmin yük avtomobilinin içərisi ərzaqla dolu olub. Bütövlükdə alışan avtomobili söndürmək üçün əraziyə Fövqəladə Hallar Nazirliyinin yanğınsöndürənləri çağırılıb.

Təhlükəsizlik baxımından yol polisləri əməkdaşları avtomobillərin hərəkətini tamamilə məhdudlaşdırıb.