Xeberle.com konkret.az-a istinadən xəbər verir ki, Sumqayıt şəhərində yaşayan 56 yaşlı Qarabağ müharibəsi veteranı dünən COVID-19-dan vəfat edib.

Xatırladaq ki, İlham Sarıyev I Qarabağ müharibəsinin iştirakçısı olub və bir sıra ağır döyüşlərdə iştirak edib. Ondan geriyə qalan və qızğın döyüşlərin getdiyi vaxt çəkilən videomüsahibədə İlham Sarıyev yaralıların daşınmasındakı çətinliklərdən danışır. Onların daşınması üçün "UAZ” markalı avtomobillərin olmadığını, bu səbəbdən də yaralı döyüşçüləri vaxtında xəstəxanalara çatdırmağın müşkülə çevrildiyini bildirir.

Qeyd edək ki, İlham Sarıyev əslən Qubadlı rayonunun Mahmudlu kəndindən olub. Müharibədən sonra  o, sürücü kimi fəaliyyət göstərib. Onu da əlavə edək ki, İlham Sarıyevin həyat yoldaşı Validə Sarıyeva da cəmi bir gün fərqlə  koronavirusdan dünyasını dəyişib. Mərhumun iki övladı (bir oğlu, bir qızı) yadigar qaldı.

Doğmalarının bildirdiyinə görə, veteran işğaldan azad edilən Qubadlını görmək həsrəti və həvəsilə yaşasa da, təəssüf ki, koronavirus bəlası onun arzusunu ürəyində qoydu.

Allah rəhmət eləsin!