Ukraynanın Donetsk şəhərində azərbaycanlı iş adamı avtomobilində partladılaraq öldürülüb.

Donetsk vilayəti Azərbaycanlılar Konqresinin sədr müavini, Krasnoarmeysk şəhəri Azərbaycanlılar Cəmiyyətinin sədri Şahin Bəylərov APA-ya bildirib ki, əslən Naxçıvan Muxtar Respublikasının Sədərək rayonundan olan, Ukrayna vətəndaşı, 57 yaşlı C.Məmmədovun avtomobili ötən həftənin şənbə günü Donetskdə qumbaraatanla atəşə tutularaq partladılıb.

C. Məmmədov avtomobilin partlaması nəticəsində yanaraq ölüb.

30 ildən çox Ukraynada yaşamış C. Məmmədov Donetsk vilayətində sərnişindaşıma və xaricdən avtomobillərin idxalı biznesi ilə məşğul olub. O, bir müddət əvvəl Donetskdə azərbaycanlıları təmsil edən cəmiyyət də yaradaraq ona rəhbərlik edib. Onun meyiti Azərbaycana göndərilərək doğulduğu rayonda dəfn olunub.

Qeyd edək ki, Ukraynada, konkret olaraq Donetsk və Luqanskda imkanlı azərbaycanlıların, iş adamlarının öldürülməsi, hücuma məruz qalması və ya müəmmalı şəkildə yoxa çıxması halları son vaxtlar tez-tez baş verir.

Dünən Donetskdə daha bir azərbaycanlının itkin düşməsi, ona məxsus kafe və restoranların partladılması barədə xəbər yaymışdı. Bu, əslən Salyan rayonundan olan 70 yaşlı Məmmədəli Qaçayev idi. Onun taleyindən hələ də xəbər yoxdur.  (Virtualaz.org)