Sumqayıtda Azərbaycan prospekti, Sülh küçəsi boyu, həmçinin digər ərazilərdə də yağış barmaqlıqları, kanalizasiya qapaqlarını oğurlayıblar.
Xeberle.com-un məlumatına görə, naməlum şəxslər prospekt boyu avtomobil yolunda quraşdırılan yağış barmaqlıqlarını oğurlayıblar. Nəticədə Sumqayıtın ən sıx prospekt və küçələrində avtomobillər üçün ciddi təhlükə yaranıb.
Məsələ ilə bağlı Sumqayıt Sukanal İdarəsindən Xeberle.com-a bildirilib ki, belə hallara daha çox şəhərin mərkəzi küçələrində və ətraf qəsəbələrdə rast gəlinir: "Araşdırmalar göstərir ki, kanalizasiya qapaqları və barmaqlıqlar ayrı-ayrı şəxslər tərəfindən oğurlanaraq metal qəbulu məntəqələrinə təhvil verilir. Bəzi insanların asan yolla qazanc əldə etmək üçün törətdiyi bu əməllər idarəni əlavə xərclərlə üzləşdirməklə yanaşı, kanalizasiya infrastrukturlarının istismarını çətinləşdirir.
Kanalizasiya quyularının açıq qalması xüsusilə gecə saatlarında sürücülər və piyadalar üçün ciddi təhlükə yaradır”.
Qurum bildirir ki, kanalizasiya qapaqları və yağış barmaqlıqlarının oğurlanması hallarının araşdırılması və qarşısının alınması məqsədilə yerli Sukanal idarəsi tərəfindən hüquq-mühafizə orqanına və digər aidiyyatı təşkilatlara müraciətlər olunub.
Təhlükə mənbəyi olan ağzı açıq quyular isə, idarə tərəfindən qapaqlarla təmin olunacaq.
Xədicə Səxavətqızı
Xəbərdən istifadə edərkən istinad etmək vacibdir.
