Son günlərdə iki ədəbiyyat və sənət adamının - xalq yazıçısı Çingiz Abdullayev və aktyor, "Bakılı oğlanlar” komandasının üzvü Bəhram Bağırzadənin "Neftçi” futbol klubunun idarə heyətində yüksək səviyyəli postlara seçilməsi mətbuatın gündəmini zəbt edib. Hər iki təyinat birmənalı qarşılanmayıb.
Bu barədə yazarlar arasında sorğu keçirilib: Sizcə, humanitar sahənin adamlarının futbola üz tutmağı nə dərəcədə doğrudur? Onlar futbolumuz üçün yaxşı işlər görə biləcəklərmi?
Cavabları təqdim edirik:

Aqşin Yenisey - Gəlin bu dəfə bir az fatalist kimi düşünək, yəni həmişə söydüyümüz bəxtə, taleyə inanaq. İnanaq ki, təsadüf Çingiz Abdullayevi və Bəhram Bağırzadəni, nəhayət ki, olmalı olduqları yerə aparıb çıxarıb. Onsuz da Azərbaycan futbolu tragikomedik bir vəziyyətdə idi, ona görə də məntiq qanunları da rəhbərlikdə bir detektivin və bir yumoristin olmasının tərəfində idi. Buna bir eksperiment kimi də yanaşmaq lazımdır. Əgər Çingiz Abdullayev və Bəhram Bağırzadə futbolumuza uğur gətirsələr, incəsənət sahəsində nə qədər boş-bekar xalq yazıçısı, yumorist, bəstəkar, dirijor, hüsnxətt müəllimi varsa, hamısını yönəldərik idmana, bədən tərbiyəsinə. Onsuz da ortalıqda qalanda ruhumuzun tərbiyəsini pozmaqdan başqa əllərindən bir iş gəlmir. Odur ki, mən "vətən qayasında bitmiş bir mamır” kimi hər iki təyinata bəri başdan və ucadan deyirəm: "Ya Allah!”
Sevinc Elsevər - Hamımız bilirik ki, Çingiz Abdullayev detektiv yazıçıdır. Çingiz bəyin "Neftçi” klubuna yüksək posta seçilməsi yazıçılar arasında birmənalı qarşılanmadı, hər kəs bir cür fikrini bildirdi. Kimi ironiya elədi, kimi tənqid elədi, kimi güldü. Amma bir onu bilirəm ki, hamı öz yerində olsa, yaxşı olar. Uşaq vaxtı orta məktəb ədəbiyyat dərsliyində əzbərlədiyimiz bir şeir vardı: "Səhv düşəndə yerimiz”. Bu cür əhvalatlar eşidəndə yadıma o şeir düşür.
Sosial şəbəkələrdə futbolla maraqlanan xeyli dostum var, hamısının da bu təyinata münasibəti mənfi idi. Od olmayan yerdən də tüstü çıxmaz. Mən bilmirəm, Çingiz bəy özü necə futbol oynayır? Ümumiyyətlə, futbol oynaya bilirmi? Futbolçularımız Çingiz Abdullayevin və Bəhram Bağırzadənin fəaliyyətindən necə yararlana bilərlər, onu da bilmirəm. Bizə ancaq uğur diləmək qalır. Təki "Neftçi”nin udan günü bundan sonra olsun.
Kəramət Böyükçöl - Onsuz da mən heç vaxt inanmamışam, inanmıram və inanmayacam ki, nə vaxtsa Azərbaycanda yaxşı futbol olacaq. Qətiyyətlə deyə bilərəm ki, mümkün deyil. Məsələyə bu məntiqlə yanaşanda "Nefçi” klubunda Çingiz Abdullayev və Bəhram Bağırzadə deyil, kim olur-olsun, şəxsən mənim üçün fərqi yoxdur. Əksinə, bir xeyli güldüm, yəni yazıçının futbol klubunda yüksək səviyyəli posta seçilməsi mənə çox maraqlı gəldi. Hərdən belə maraqlı eksperimentlər eləmək lazımdır. Amma deyim ki, bir şey də ola bilər: bəlkə, Çingiz Abdullayevi bu posta seçməklə onun oxucularını ələ salırlar? Nə bilim, vallah...
Rəbiqə Nazimqızı - Mən məsələyə pozitiv yanaşmaq istərdim. Bəhram Bağırzadə çox yaxşı yumoristdir, çox yaxşı azarkeşdir. Futbola canı yanır. Çingiz Abdullayevi də dünya tanıyır. Amma məncə, futbolumuzun düzəlməsi üçün təfəkkür dəyişməlidir - biz komanda olmağı bacarmalıyıq. Bundan sonra peşəkarlığa xidmət edən islahatlar lazımdır. Fərdlərin dəyişməsi az şeyi həll edir. Ancaq ümid edək ki, onlar yaxşı işlər görəcəklər. Mən bunu istəyirəm və hamısına uğurlar arzulayıram.
Kənan Hacı - Suala rəhmətlik Qabilin məşhur misrasıyla cavab verə bilərəm: "Müsibət oluruq biz, səhv düşəndə yerimiz!” Məncə, Çingiz Abdullayevin futbol klubuna prezident seçilməsi XXI əsrin ən böyük məzhəkəsidir.
Ağakişioğlu Mahmud - Futbolla yaxından maraqlanmasam da, məlumatım var ki, dünya təcrübəsində bu kimi hallara rast gəlinir. Yəni müəyyən ictimai statusu olan adamları idman klublarının müşahidə şuralarına üzv və ya sədr seçirlər. Misallar da çəkmək olar... Bildiyimə görə, Bəhram Bağırzadə və Çingiz Abdullayev "Neftçi"də elə vəzifəyə təyin ediliblər ki, onlar komandanın texniki-taktiki hazırlığına qarışa bilməyəcəklər. Mən burada elə də paradoksal hal görmürəm.
O ki qaldı bu adamların nə iş görə biləcəklərinə, heç nə dəyişməyəcək. Komandanın oyunu başqa məslələrdən daha çox asılıdır, daha çox isə məşqçidən asılıdr. Yaxşı olardı ki, Çingiz Abdullayevi komandanın baş məşqçisi təyin edəydilər, bəlkə, onda komanda detektivvari oyun nümayiş etdirər və oyunu gözlənilməz sonluqla yekunlaşdırardı.  (milli.az)